സിബിഎസ്ഇ 12-ാം ക്ലാസ് പുനര്‍മൂല്യനിര്‍ണ്ണയത്തില്‍ നിന്നും കോ എംപ്റ്റ് എഡ്യൂ ടെക്കിനെ ഒഴിവാക്കും. ഈ പ്ലാറ്റ്ഫോം പുനര്‍മൂല്യനിര്‍ണ്ണയത്തിനായി ഉപയോഗിക്കില്ലെന്ന് സിബിഎസ്ഇ വിദ്യാര്‍ഥികള്‍ക്ക് ഉറപ്പുനല്‍കി. കോ എംപ്റ്റ് കൈവശം വച്ച വിദ്യാര്‍ത്ഥികളുടെ പരീക്ഷാ ഡാറ്റ സിബിഎസ്ഇയുടെ ഡിജിറ്റല്‍ ഇന്‍ഫ്രാസ്ട്രക്ചറിലേക്ക് മാറ്റി. പുനര്‍ മൂല്യനിര്‍ണയ പ്രക്രിയ ബോര്‍ഡിന്റെ സ്വന്തം പോര്‍ട്ടലില്‍ ആകും നടത്തുക.
സിബിഎസ്ഇ ഡിജിറ്റല്‍ സംവിധാനത്തില്‍ സൈബര്‍ സുരക്ഷാ പരിശോധനയില്‍ ഗുരുതരമായ അപകടസാധ്യതകള്‍ കണ്ടെത്തിയിരുന്നു. കാണ്‍പൂര്‍ , മദ്രാസ് ഐഐടികള്‍ നടത്തിയ പരിശോധനയിലാണ് നിരവധി അപകടസാധ്യതകള്‍ കണ്ടെത്തിയത്. സിബിഎസ്ഇ യുടെ പോസ്റ്റ്-റിസള്‍ട്ട് ആക്ടിവിറ്റീസ് (PRA) പോര്‍ട്ടല്‍ തുറക്കുന്നത് നീട്ടി വെച്ചു.
ടിസിഎസിനെ വളരെ ചെറിയ പോയിന്റുകള്‍ക്ക് മറികടന്നുകൊണ്ടാണ് കോ എംപ്റ്റ് ടെക് സിബിഎസ്ഇയുടെ കോണ്‍ട്രാക്ട് സ്വന്തമാക്കുന്നത്. സാങ്കേതിക വിലയിരുത്തലുകളില്‍ ഈ കമ്പനി നൂറില്‍ 91 പോയിന്റുകളും ടിസിഎസ് 89 പോയിന്റുകളുമാണ് നേടിയിരുന്നത്. അപേക്ഷ അയയ്ക്കാന്‍ ആരംഭിച്ച ആദ്യ ദിവസം മുതല്‍ നിരവധി സൈബര്‍ ആക്രമണങ്ങളാണ് വിദ്യാര്‍ഥികള്‍ നേരിട്ടതെന്നാണ് റിപ്പോര്‍ട്ടുകള്‍.
