കണ്ണിനുള്ളിലും ചുറ്റിലും വല്ലാതെ ബുദ്ധിമുട്ട്, ചൊറിച്ചില് കണ്ണ് തിരുമിയേ മതിയാകൂ എന്ന് കണ്ണ് കേഴുന്നു… ഇത്തരമൊരു തോന്നല് ഇടയ്ക്കിടെ നിങ്ങള്ക്കും ഉണ്ടാകാറില്ലേ? കണ്ണുകള് ശക്തിയായി തിരുമുന്ന ഈ ശീലം അത്രവലിയ അപകടകരമല്ല എന്നാകും നമ്മളില് പലരും ധരിച്ച് വച്ചിരിക്കുന്നത്. എന്നാല് കാര്യങ്ങള് അങ്ങനെയല്ല. കണ്ണിന് ഇന്ഫക്ഷന് ഉണ്ടാകാനുള്ള സാധ്യത മുതല് കോര്ണിയയ്ക്ക് തകരാര് ഉണ്ടാകുന്നതിന് വരെ ഈ ശീലം വഴിവച്ചേക്കാം. (Is Rubbing Your Eyes Bad For You?)
കണ്ണ് തിരുമാന് തോന്നുന്നതെപ്പോള്? എന്തുകൊണ്ട്?
ചൊറിച്ചില് അനുഭവപ്പെടുമ്പോഴാണല്ലോ നമ്മുക്ക് കണ്ണുകള് തിരുമാന് തോന്നുന്നത്. ഈ ചൊറിച്ചില് സെന്സേഷനുകളില് പകുതിയുടേയും കാരണം ചില തരം അലര്ജികളാണ്. കോശങ്ങളുടെ ഉപരിതലത്തില് ഇത്തരം അലര്ജെന്സ് പറ്റിപ്പിടിക്കുമ്പോള് ഇന്ഫ്ലമേറ്ററി കെമ്മിക്കല്സ് പുറത്തുവരുമ്പോഴാണ് നമ്മുക്ക് ചൊറിച്ചില് അനുഭവപ്പെടുന്നത്.
ചൊറിച്ചിലിന്റെ മറ്റൊരു കാരണമായി പറയുന്നത് ഡ്രൈ ഐ സിന്ഡ്രോം ആണ്. മണല്പോലെ എന്തോ ഒന്ന് കണ്ണില് കയറിയത് പോലെ ഒരു തോന്നലുണ്ടാകുന്നത് ഇതുമൂലമാകാം.
ഇത് കൂടാതെ കണ്പോളയുടെ ചര്മ്മത്തിലുണ്ടാകുന്ന ഇന്ഫ്ളമേഷനും ചൊറിച്ചിലിന് ഇടയാക്കും.
കണ്പോളയുടേയും കണ്ണിന്റേയും ഉപരിതലത്തിലെ ചര്മ്മപാളി വളരെ സെന്സിറ്റീവായതിനാല് തന്നെ വളരെ വേഗത്തില് അലര്ജിയുണ്ടാകാനും മറ്റും സാധ്യതയുണ്ട്. കോണ്ടാക്ട് ലെന്സുകളില് നിന്നോ അന്തരീക്ഷ മലിനീകരണം കൊണ്ടോ വേഗത്തില് കണ്ണിന് അലര്ജിയുണ്ടായേക്കാം.
കണ്ണുതിരുമല് എത്രമാത്രം അപകടകരമാണ്?
കോര്ണിയയ്ക്ക് ഏല്ക്കുന്ന തകരാറുകളാണ് കണ്ണുതിരുമലിന്റെ ഏറ്റവും വലിയ റിസ്ക്. കോര്ണിയ നേര്ത്തതാകാനും ആകൃതിയില് വ്യത്യാസം വരാനും ഉള്പ്പെടെ ഇടയ്ക്കിടെ കണ്ണുതിരുമുന്നത് ഇടയാക്കും. ഇത് ഏറ്റവും ഗുരുതരമായാല് കോര്ണിയ മാറ്റിവയ്ക്കേണ്ടതായി പോലും വന്നേക്കാം.
കൂടാതെ കണ്ണ് ചുവക്കാനും കണ്ണിലെ അലര്ജിയും ഇന്ഫ്ലമേഷനും കൂടുതല് ഗുരുതരമാകാനും വ്യാപിക്കാനും കണ്ണുതിരുമുന്നത് ഇടയാക്കും.
കണ്ണില് എന്തെങ്കിലും പോയെന്ന് തോന്നിയാല് തിരുമുന്നതിന് പകരം കണ്ണ് കഴുകാനും കണ്ണീര് വരാന് നോക്കുകയുമാണ് വേണ്ടത്. മണിക്കൂറുകളോളം ഇത് നീണ്ടുനിന്നാല് ഡോക്ടറുടെ സേവനം തേടണം.
