കോട്ടയം തിടനാട് പതിനൊന്നുകാരനെ മരിച്ച നിലയില് കണ്ടെത്തി. തിടനാട് ടൗണില് വാടകയ്ക്ക് താമസിക്കുന്ന സുഭാഷിന്റെ മകന് ആമോസ് ആണ് മരിച്ചത്. ഫുട്ബോള് കളിക്കുന്നതിനിടെയുണ്ടായ തര്ക്കത്തെ തുടര്ന്ന് ആത്മഹത്യചെയ്തെന്നാണ് സൂചന.
ഇന്നലെ വൈകീട്ടാണ് സംഭവം നടക്കുന്നത്. വൈകിട്ട് സ്കൂള് വിട്ട ശേഷം ഫുട്ബോള് കളിക്കുന്നതിനിടെ സഹോദരനുമായി തര്ക്കം ഉണ്ടാകുകയായിരുന്നു. തര്ക്കത്തെ തുടര്ന്ന് കുട്ടി വീട്ടിലേക്ക് മടങ്ങിപ്പോയി. ശേഷം ജീവനൊടുക്കിയെന്നാണ് വിവരം. ഫുട്ബോള് കളി കഴിഞ്ഞ് തിരിച്ചെത്തിയ സഹോദരനും ആ സമയത്ത് വീട്ടിലേക്ക് മടങ്ങിയെത്തിയ കുട്ടിയുടെ പിതാവുമാണ് ആമോസ് മരിച്ച് കിടക്കുന്നതായി കണ്ടെത്തിയത്. കുട്ടിയെ ഉടന് തന്നെ ആശുപത്രിയിലേക്ക് കൊണ്ടുപോയെങ്കിലും ഡോക്ടേഴ്സ് മരണം സ്ഥിരീകരിക്കുകയായിരുന്നു. സംഭവത്തില് പൊലീസ് അന്വേഷണം ആരംഭിച്ചു. ആമോസിന്റെ സംസ്കാരചടങ്ങുകള് ഇന്ന് നടക്കും.
