ലയണല് മെസിയെ കേരളത്തിലെത്തിക്കാനുള്ള ശ്രമത്തിന്റെ മറവില് നടന്നത് കള്ളപ്പണ ഇടപാടെന്ന് മുഹമ്മദ് ഷിയാസ് എംഎല്എ. കേരളത്തിലെ ഫുട്ബോള് ആരാധകരായ മനുഷ്യരെ ചതിച്ചുകൊണ്ടുള്ള നീക്കമായിരുന്നു ഇതെന്ന് ഷിയാസ് ട്വന്റിഫോറിനോട് പറഞ്ഞു. കലൂര് സ്റ്റേഡിയം തട്ടിക്കൊണ്ടുപോകാനും അതിന്റെ പേരില് കള്ളപ്പണ ഇടപാട് നടത്താനും വേണ്ടിയുള്ള ബോധപൂര്വമായ ശ്രമമാണ് അന്നത്തെ സര്ക്കാരിന്റെ നേതൃത്വത്തില് നടന്നത്. ആര്ക്കൊക്കെ എത്ര രൂപ കിട്ടിയെന്ന് മാത്രമാണ് ഇനി അറിയാനുള്ളതെന്നും ഷിയാസ് കൂട്ടിച്ചേര്ത്തു. (muhammed shiyas mla on messi kerala visit promise)
കലൂര് സ്റ്റേഡിയം ഈ വിധത്തിലെങ്കിലും തിരിച്ചുകിട്ടിയത് ഭാഗ്യമാണെന്ന് മുഹമ്മദ് ഷിയാസ് പറഞ്ഞു. ‘മരം മുറിച്ചുകൊണ്ട് പോകുന്നതുപോലെ എളുപ്പമല്ല ജനങ്ങളെ പറ്റിക്കാന്. അത് ഇനിയെങ്കിലും തട്ടിപ്പുകാര് മനസിലാക്കണം’. ഷിയാസ് പറഞ്ഞു.
അതേസമയം മെസിയുടെ പേരിലുള്ള തട്ടിപ്പില്, കായിക വകുപ്പ് റിപ്പോര്ട്ടിന്റെ കൂടുതല് വിവരങ്ങള് പുറത്ത് വന്നിട്ടുണ്ട്. മെസ്സിയെയും അര്ജന്റീന ടീമിനെയും കേരളത്തിലെത്തിക്കാനുള്ള വ്യാജ നീക്കത്തിലൂടെ നടന്നത് മുന് സര്ക്കാരും സ്പോണ്സറും തമ്മിലുള്ള അവിശുദ്ധ കൂട്ടുകെട്ട്. കളക്ഷന് ഏജന്റായി വെച്ച വിദേശ സ്ഥാപനത്തിന്റെ പശ്ചാത്തലം സുതാര്യമല്ല. വിദേശ നാണയ ഒഴുക്ക് ഉണ്ടായിട്ടും ധന വകുപ്പ് പരിശോധന നടത്തിയില്ലെന്നും റിപ്പോര്ട്ടിലുണ്ട്.
