തൃശൂര്‍: ഡിവൈഎഫ്‌ഐ സംസ്ഥാന സമ്മേളനത്തിന്റെ ഭാഗമായി അവതരിപ്പിച്ച ‘മിസ’ നാടകത്തിനെതിരായ അപവാദപ്രചരണത്തില്‍ പ്രതികരണവുമായി തിയേറ്റര്‍ ആര്‍ടിസ്റ്റ് ചിന്നൂസ് ചിലങ്ക. നാടകത്തിന്റെ ഒരു ഭാഗം മാത്രം മുറിച്ചെടുത്ത് തെറ്റായ രീതിയില്‍ പ്രചരിപ്പിക്കുന്നുവെന്ന് ചിന്നൂസ് ട്വന്റിഫോറിനോട് പറഞ്ഞു. ഭരണകൂട ഭീകരതയെക്കുറിച്ചാണ് ഈ നാടകം സംസാരിക്കുന്നത്. ഇത് കൊള്ളേണ്ടയിടത്ത് തന്നെ കൊണ്ടു എന്ന് കരുതുന്നു. നാടകവുമായി ശക്തമായി മുന്നോട്ട് പോകുമെന്നും ചിന്നൂസ് ചിലങ്ക കൂട്ടിച്ചേര്‍ത്തു. ( actress chinnus chilanka on dyfi drama controversy)
അടിയന്തരവാസ്ഥയില്‍ തുടങ്ങി ഫാസിസത്തെക്കുറിച്ചും ഭരണകൂട ഭീകരതകളെക്കുറിച്ചുമെല്ലാം സംസാരിക്കുന്ന നാടകമാണ് മിസ എന്ന് ചിന്നൂസ് പറഞ്ഞു. മിസ ആരെയാണോ മുറിവേല്‍പ്പിക്കുക, നാടകം ആരെയാണോ പൊള്ളിക്കുക, അവര്‍ക്ക് നന്നായി കൊണ്ടിട്ടുണ്ടെന്ന് ഈ അപവാദ പ്രചരണങ്ങളില്‍ നിന്ന് വ്യക്തമായെന്നും ചിന്നൂസ് വ്യക്തമാക്കി.
നടിയുടെ വസ്ത്രധാരണം ചൂണ്ടിക്കാട്ടിയാണ് സോഷ്യല്‍ മീഡിയയില്‍ ഒരു വിഭാഗം മിസ നാടകത്തിനെതിരെ രൂക്ഷ പരിഹാസം ഉയര്‍ത്തിയത്. അടിയന്തരവാസ്ഥക്കാലത്തെ ഭരണകൂട ഭീകരതയുടെ ഇരയായ സ്‌നേഹലത റെഡ്ഡിയുടെ ജീവിതമാണ് നാടകത്തിന് ആധാരം. കെ പി ശശികല ഉള്‍പ്പെടെയുള്ളവരാണ് നാടകത്തിനും നടിയ്ക്കുമെതിരെ രംഗത്തെത്തിയത്. നാടകം സദാചാരവാദികളെ അസ്വസ്ഥരാക്കിയതില്‍ തനിക്ക് അത്ഭുതം തോന്നുന്നില്ലെന്നായിരുന്നു ഡിവൈഎഫ്‌ഐ സംസ്ഥാന സെക്രട്ടറി വി കെ സനോജിന്റെ പ്രതികരണം.
