ത്രികോണമത്സരം നടക്കുന്ന ആറന്മുളയില് മൂന്ന് മുന്നണികളുടെയും സ്ഥാനാര്‍ത്ഥികള്‍ വലിയ ആത്മവിശ്വാസത്തിലാണ്. പരസ്യപ്രചാരണം അവസാനിക്കുന്ന ഘട്ടത്തിലും ആരോപണ പ്രത്യാരോപണങ്ങളുമായി തിരഞ്ഞെടുപ്പുകളം കൂടുതല്‍ ചൂട് പിടിച്ചു. മുന്‍ തിരഞ്ഞെടുപ്പുകളെക്കാള്‍ വലിയ ഭൂരിപക്ഷത്തില്‍ ഇക്കുറി താന്‍ ജയിക്കുമെന്ന് എല്‍ഡിഎഫ് സ്ഥാനാര്‍ഥി വീണ ജോര്‍ജ് പറഞ്ഞു. അമിത ആത്മവിശ്വാസം കൊണ്ടല്ല ഭൂരിപക്ഷം പറഞ്ഞത്. തനിക്ക് നാടിന്റെ മനസ്സറിയാമെന്നും വീണാ ജോര്‍ജ് പറഞ്ഞു.
ആറന്മുളയില് ഇടതുപക്ഷ ജനാഥിപത്യ മുന്നണി 30000ത്തിലധികം വോട്ടിന്റെ ഭൂരിപക്ഷത്തില്‍ വിജയിക്കും. 2021നേക്കാള്‍ മികച്ച ഭൂരിപക്ഷത്തില്‍ ജയിക്കും. അമിതാത്മവിശ്വാസമല്ല; ഈ മണ്ഡലത്തിലെ വോട്ടര്‍മാരെ തനിക്ക് അറിയാം. ആന്റോ ആന്റണി എംപി കല്ലിട്ട സ്റ്റേഡിയം ഇപ്പോഴും കാടുപിടിച്ച് കിടക്കുന്നു. അദ്ദേഹമാണ് താന്‍ മൂന്നാം സ്ഥാനത്തേക്ക് പോകുമെന്ന് പറയുന്നത്. ഹര്‍ഷിന മണ്ഡലത്തിലെത്തി യുഡിഎഫിന് വേണ്ടി പ്രചരണം നടത്തിയത് രാഷ്ട്രീയ ലക്ഷ്യങ്ങളോടെ. ഇതില്‍ കൃത്യമായ ഗൂഢാലോചനയുണ്ട്. സര്‍ക്കാര്‍ ആരോഗ്യസംവിധാനത്തെ പ്രതിപക്ഷം ആക്രമിച്ചത് മരുന്ന് കമ്പനികളില്‍ നിന്ന് പണം വാങ്ങി. സത്യം ജനങ്ങള്‍ തിരിച്ചറിയും – വീണാ ജോര്‍ജ് പറഞ്ഞു.
ആരോഗ്യ ദിനത്തില്‍ ആരോഗ്യമുള്ള ആറന്മുളയെ വീണ്ടെടുക്കാന്‍ യുഡിഎഫ് സ്ഥാനാര്‍ഥി നടത്തിയ പ്രഭാത നടത്തത്തില്‍ എംപി ആന്റോ ആന്റണി വീണ ജോര്‍ജിനെ കടന്നാക്രമിച്ചു. എല്‍ഡിഎഫ് സ്ഥാനാര്‍ഥി മൂന്നാം സ്ഥാനത്തേക്ക് പിന്തള്ളപ്പെടുമെന്ന് ആന്റോ ആന്റണി പറഞ്ഞു.
യുഡിഎഫ് സ്ഥാനാര്‍ത്ഥി അബിന്‍ വര്‍ക്കിയും വിജയപ്രതീക്ഷ പങ്കുവെച്ചു. മണ്ഡലത്തില്‍ യുഡിഎഫ് ഒറ്റക്കെട്ടായി പ്രവര്‍ത്തിച്ചത് ഗുണം ചെയ്‌തെന്നും അബിന്‍ വര്‍ക്കി പറഞ്ഞു. എഫ്‌സിആര്‍എ അടക്കമുള്ള വിഷയങ്ങള്‍ ബിജെപിക്ക് തിരഞ്ഞെടുപ്പില്‍ തിരിച്ചടിയാകില്ലെന്ന് എന്‍ഡിഎ സ്ഥാനാര്‍ത്ഥി കുമ്മനം രാജശേഖരന്‍ വ്യക്തമാക്കി. രണ്ടും മൂന്നും സ്ഥാനത്തേക്ക് എല്‍ഡിഎഫും യുഡിഎഫും മത്സരിച്ചോട്ടെ. ഒന്നാം സ്ഥാനം ബിജെപിക്ക് ആയിരിക്കുമെന്നും കുമ്മനം രാജശേഖരന്‍ പറഞ്ഞു.
