വിദ്വേഷ പരാമര്ശത്തില് ബി ഗോപാലകൃഷ്ണന് പിന്തുണയുമായി ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. ഗോപാലകൃഷ്ണന് പറഞ്ഞതില് എന്താണ് തെറ്റെന്ന് രാജീവ് ചന്ദ്രശേഖര് ചോദിച്ചു. ശബരിമലക്കൊള്ള നടക്കുന്നതിന്റേയും ഗുരുവായൂരില് നിന്ന് പണം കാണാതാകുന്നതിന്റേയും പശ്ചാത്തലത്തില് ഗുരുവായൂരില് വിശ്വാസിയായ ഒരു എംഎല്എ ഉണ്ടാകണമെന്ന് പറഞ്ഞതില് എന്താണ് തെറ്റെന്ന് രാജീവ് ചന്ദ്രശേഖര് ചോദിച്ചു.
ബിജെപി പറഞ്ഞതെല്ലാം വിദ്വേഷവും മതമാണ് മതമാണ് എന്നൊക്കെ പാടി നടക്കുന്നവര് സെക്കുലറാണെന്നുമൊന്നും താന് വിശ്വസിക്കുന്നില്ലെന്ന് രാജീവ് ചന്ദ്രശേഖര് പറഞ്ഞു. ബി ഗോപാലകൃഷ്ണന് ഒരു കാര്യം പറഞ്ഞത് ചര്ച്ച ചെയ്യാതെ പെട്ടെന്ന് അതിനെ വിദ്വേഷ പ്രസംഗമായി കാണേണ്ടായിരുന്നു എന്നാണ് തന്റെ അഭിപ്രായമെന്നും രാജീവ് ചന്ദ്രശേഖര് വ്യക്തമാക്കി.
വിദ്വേഷ പരാമര്ശത്തില് ഗുരുവായൂര് ടെമ്പിള് പോലീസ് ആണ് തൃശൂര് ജില്ലാ കളക്ടറുടെ നിര്ദ്ദേശപ്രകാരം കേസെടുത്തത്. സാമുദായിക വികാരം ഉപയോഗിച്ച് വോട്ട് തേടിയെന്ന് തിരഞ്ഞെടുപ്പ് കമ്മീഷന്റെ കണ്ടെത്തല്. ജനപ്രാതിനിധ്യ നിയമം, 1951 ലെ 123(3) വകുപ്പ് പ്രകാരവും ഇന്ത്യന് തിരഞ്ഞെടുപ്പ് കമ്മീഷന് നിശ്ചയിച്ച മാതൃകാ പെരുമാറ്റച്ചട്ടത്തിലെ വ്യവസ്ഥകള് പ്രകാരവുമാണ് പരാതിയില് കേസെടുക്കാന് തിരഞ്ഞെടുപ്പ് കമ്മീഷന് നിര്ദ്ദേശിച്ചത്. വോട്ട് തേടുന്നതിനായി ജാതി അല്ലെങ്കില് സാമുദായിക വികാരങ്ങള് ഉപയോഗിച്ച് അഭ്യര്ഥിക്കാന് പാടില്ല, പള്ളികള്, ക്ഷേത്രങ്ങള് അല്ലെങ്കില് മറ്റ് ആരാധനാലയങ്ങള് എന്നിവ തിരഞ്ഞെടുപ്പ് പ്രചരണത്തിനായുള്ള വേദിയായി ഉപയോഗിക്കരുത് എന്ന, മാതൃകാ പെരുമാറ്റച്ചട്ടത്തിലെ വ്യവസ്ഥകള് ലംഘിക്കപ്പെട്ടിട്ടുണ്ടെന്ന് കണ്ടെത്തിയതോടെയാണ് നടപടി.
