യുവേഫ ചാമ്പ്യന്‍സ് ലീഗ് മുന്‍ചാമ്പ്യന്‍മാരായ റയല്‍ മാഡ്രിഡിന്റെ പോസ്റ്റിലേക്ക് രണ്ട് നെടുനീളന്‍ ഫ്രീകിക്ക് അടിച്ചുകയറ്റുമ്പോള്‍ ആര്‍സണലിന്റെ ഇംഗ്ലീഷ് മിഡ്ഫീല്‍ഡര്‍ ഡെക്ലാന്‍ റൈസ് പുതിയ ചരിത്രം കുറിക്കുകയായിരുന്നു. ഒരു നോക്കൗട്ട്-സ്റ്റേജ് മത്സരത്തില്‍ രണ്ട് ഡയറക്ട് ഫ്രീകിക്കുകളില്‍ നിന്ന് ഗോള്‍ നേടുന്ന ആദ്യ കളിക്കാരനായി മാറുകയായിരുന്നു റൈസ്. ടൂര്‍ണമെന്റിലെ ശക്തരായ ടീമിനെതിരെയായിരുന്നു ആര്‍സണലിന്റെ വിജയമെന്നതും പ്രത്യേകത തന്നെ.
ചൊവ്വാഴ്ച റയല്‍ മാഡ്രിഡിനെതിരായ ക്വാര്‍ട്ടര്‍ ഫൈനല്‍ ആദ്യ പാദ മത്സരത്തിന്റെ രണ്ടാംപകുതിയിലെ 58-ാം മിനിറ്റിലും 70-ാം മിനിറ്റിലുമായിരുന്നു റൈസിന്റെ ഗോളുകള്‍. റൈസിന്റെ രണ്ട് സെറ്റ് പീസ് ഗോളുകള്‍ അടക്കം മൂന്നുഗോളുകള്‍ക്കായിരുന്നു ഗണ്ണേഴ്സിന്റെ വിജയം
