പുതുവത്സര ആശംസകള് അറിയിച്ചില്ല എന്ന കാരണത്തില് 24 തവണ യുവാവിനെ കുത്തിപ്പരിക്കേല്പ്പിച്ച് കാപ്പ കേസ് പ്രതി. ആറ്റൂര് പൂവത്തിങ്കല് വീട്ടില് സുഹൈബിനാണ് കുത്തേറ്റത്. തൃശൂര് മെഡിക്കല് കോളേജില് അത്യാസന്ന വിഭാഗത്തില് ചികിത്സയിലാണ് സുഹൈബ്.
പുതുവത്സര രാത്രി ഏറെ വൈകി സുഹൃത്തുക്കള്ക്കൊപ്പം ഗാനമേള കഴിഞ്ഞ് തന്റെ ബൈക്കില് മടങ്ങി വരികയായിരുന്നു സുഹൈബ്. മുള്ളൂര്ക്കരയിലെത്തിയപ്പോള് ബസ് സ്റ്റോപ്പില് പരിചയമുള്ള നാലഞ്ചു പേര് ഇരിക്കുന്നത് കണ്ടു. അവര്ക്കെല്ലാം ഹാപ്പി ന്യൂ ഇയര് പറയുകയും ചെയ്തു. ബസ് സ്റ്റോപ്പില് ഇരുന്നവര്ക്കിടയില് ഉണ്ടായിരുന്ന കാപ്പാ കേസ് പ്രതി പാപ്പി എന്നു വിളിക്കപ്പെടുന്ന ഷാഫി തന്നോട് വ്യക്തിപരമായി പുതുവത്സരാശംസകള് പറഞ്ഞില്ല എന്ന കാരണത്തിന്റെ പേരില് ഏകപക്ഷീയമായി സുഹൈബിനെ ആക്രമിക്കുകയായിരുന്നു.
24 തവണയാണ് സുഹൈബിനെ കത്തികൊണ്ട് കുത്തിപ്പരിക്കേല്പ്പിച്ചത്. കൈയിലും തലയ്ക്കുമാണ് പരിക്ക്. തൃശൂര് മെഡിക്കല് കോളേജില് അത്യാസന്ന വിഭാഗത്തില് ചികിത്സയിലാണ് സുഹൈബ്. പ്രതി കൃത്യം നടത്തുമ്പോള് ലഹരി ഉപയോഗിച്ചിരുന്നു എന്നാണ് സംശയം. നിരവധി കഞ്ചാവ് കേസുകളില് പ്രതിയാണ് ഷാഫി. സുഹൈബ് ചികിത്സയിലിരിക്കുന്ന തൃശ്ശൂര് മെഡിക്കല് കോളേജില് തന്നെ ഷാഫിയും അഡ്മിറ്റ് ആയിട്ടുണ്ട്. സുഹൈബ് തന്നെയും കുത്തി പരിക്കേല്പ്പിച്ചു എന്നാണ് ഇയാളുടെ വാദം. സംഭവത്തില് പൊലീസ് കേസ് എടുത്തിട്ടുണ്ട്.
