കൊച്ചി: മുസ്‍ലിം യൂത്ത് ലീഗ് സംസ്ഥാന സമ്മേളന റാലിയിൽ കോടതി അലക്ഷ്യത്തിന് കേസ് ഫയൽ ചെയ്തു. യൂത്ത് ലീഗ് സംസ്ഥാന ജനറൽ സെക്രട്ടറി പി കെ ഫിറോസ് എംഎൽഎ, ജില്ലാ കലക്ടർ, പൊലീസ് കമ്മീഷണർ എന്നിവരെ എതിർകക്ഷികൾ ആക്കിയാണ് കേസ്. എളംങ്കുന്നപ്പുഴ പഞ്ചായത്ത് അംഗം ജഹാംഗീർ ആണ് കേസ് ഫയൽ ചെയ്തത്.
റാലിക്കെതിരെ പൊലീസ് നേരത്തെ കേസെടുത്തിരുന്നു. ഗതാഗതക്കുരുക്ക് സൃഷ്ടിച്ചതിനാണ് കേസ്. പാണക്കാട് മുനവ്വറലി ശിഹാബ് തങ്ങൾ, പി കെ ഫിറോസ് ഉൾപ്പെടെ 12 പേർക്കെതിരെയും കണ്ടാലറിയാവുന്ന രണ്ടായിരത്തോളം ആളുകൾക്കെതിരെയുമാണ് കേസ്. ബോൾഗാട്ടി ജംഗ്ഷൻ മുതൽ മറൈൻഡ്രൈവ് വരെയായിരുന്നു സമ്മേളനത്തോടനുബന്ധിച്ചുള്ള റാലി. മാർച്ചിന് പോലീസ് അനുമതി ഉണ്ടായിരുന്നു. ഗതാഗത നിയന്ത്രണത്തിൽ നേരത്തെ അറിയിപ്പുണ്ടായി. എന്നാൽ പലയിടങ്ങളിലും ഗതാഗതസംവിധാനം പാടെ പാളി. യാത്ര ചെയ്യാൻ പോലീസ് പകരം നിർദ്ദേശിച്ച പാതകളിലും പ്രവർത്തകരും വാഹനങ്ങളും നിറഞ്ഞു.
ഭൂരിഭാഗം സ്ഥലങ്ങളിലും നിയന്ത്രണം യൂത്ത് ലീഗ് വളണ്ടിയർമാർക്ക്. വലിയ ഗതാഗതക്കുരുക്കാണ് നഗരത്തിൽ രൂപപ്പെട്ടത്. ഇതേ തുടർന്നാണ് യൂത്ത് ലീഗിന്റെ സംസ്ഥാന അധ്യക്ഷൻ മുനവ്വറലി ശിഹാബ് തങ്ങൾ, സെക്രട്ടറി പി കെ ഫിറോസ് തുടങ്ങി നേതൃത്വം നൽകിയ 12 പേർക്കെതിരെയും പങ്കെടുത്ത കണ്ടാലറിയാവുന്ന രണ്ടായിരത്തോളം ആളുകൾക്കെതിരെയും കേസെടുത്തത്.
