ത്യാഗരാജ സ്വാമികളുടെ കീര്ത്തനം ചിത്രത്തിനുവേണ്ടി വേറിട്ട രീതിയില് ചിട്ടപ്പെടുത്തുകയായിരുന്നു വിദ്യാസാഗര്
വേറിട്ട പ്രമേയവും അവതരണവും കൊണ്ട് മാത്രമല്ല, സംഗീതം കൊണ്ടും പ്രത്യേകതയുള്ള ചിത്രമായിരുന്നു ദേവദൂതന്. വിദ്യാസാഗറിന്റെ ഏറ്റവും മികച്ച കോമ്പോസിഷനുകളിലൊന്നാണ് ചിത്രത്തിലേത്. 24 വര്ഷങ്ങള്ക്കിപ്പുറം കേള്ക്കുമ്പോഴും ചിത്രത്തിലെ പാട്ടുകള്ക്ക് പഴമ തോന്നുന്നില്ല എന്നതാണ് അതിന്റെ പ്രത്യേകത. ഇപ്പോഴിതാ റീ റിലീസിന് മുന്നോടിയായി ചിത്രത്തിലെ ഒരു വീഡിയോ ഗാനം കൂടി പുറത്തുവിട്ടിരിക്കുകയാണ് അണിയറക്കാര്.
എന്തരോ മഹാനുഭാവലൂ എന്ന് ആരംഭിക്കുന്ന പ്രശസ്ത ഗാനത്തിന്റെ റീമാസ്റ്റേര്ഡ് വീഡിയോ ആണ് പുറത്തുവിട്ടിരിക്കുന്നത്. ത്യാഗരാജ സ്വാമികളുടെ കീര്ത്തനം ചിത്രത്തിനുവേണ്ടി വേറിട്ട രീതിയില് ചിട്ടപ്പെടുത്തുകയായിരുന്നു വിദ്യാസാഗര്. രഘുനാഥ് പലേരി തിരക്കഥയൊരുക്കിയ ദേവദൂതന് മിസ്റ്ററി ഹൊറര് വിഭാഗത്തില് പെട്ട ഒന്നാണ്. സംഗീത സംവിധായകന് വിശാല് കൃഷ്ണമൂര്ത്തിയായി മോഹന്ലാല് എത്തിയ ചിത്രം സംഗീതത്തിന് അതീവ പ്രാധാന്യമുള്ള ഒന്നുമായിരുന്നു. ചിത്രത്തിലെ പാട്ടുകളൊക്കെ ഹിറ്റുകളായിരുന്നു. സന്തോഷ് തുണ്ടിയില് ആയിരുന്നു ഛായാഗ്രാഹകന്. സിബി മലയിലിന്റെ കരിയറിലെ ഏറ്റവും വലിയ കാന്വാസില് ഒരുങ്ങിയ ചിത്രം കൂടിയായിരുന്നു ദേവദൂതന്. വലിയ പരിശ്രമമാണ് ഈ ചിത്രത്തിനുവേണ്ടി അദ്ദേഹം നടത്തിയത്. 2000 ഡിസംബര് 22 ന് ക്രിസ്മസ് റിലീസ് ആയാണ് ചിത്രം തിയറ്ററുകളില് എത്തിയത്.
എന്നാല് വേറിട്ട കഥയും അവതരണവുമായി എത്തിയ ഈ ചിത്രത്തിന് പ്രേക്ഷകരില് സ്വീകാര്യത സൃഷ്ടിക്കാന് സാധിച്ചില്ല. ദേവദൂതന്റെ പരാജയം തനിക്ക് അക്കാലത്ത് വലിയ മാനസിക പ്രയാസം ഉണ്ടാക്കിയെന്ന് സിബി മലയില് പിന്നീട് പറഞ്ഞിട്ടുണ്ട്. അതേസമയം പില്ക്കാലത്ത് ടെലിവിഷനില് പലപ്പോഴും സംപ്രേഷണം ചെയ്യപ്പെടാറുള്ള ദേവദൂതന് പുതുതലമുറ സിനിമാപ്രേമികളുടെ ചര്ച്ചകളില് ഇടംപിടിക്കാറുണ്ട്. ശബ്ദ, ദൃശ്യ വിന്യാസത്തിനും കഥാപശ്ചാത്തലത്തിലും സംഗീതത്തിലുമൊക്കെ ഒരു കാലത്ത് പുതുമകളുമായെത്തിയ ചിത്രത്തെ അതിന്റെ രണ്ടാം വരവില് പുതുതലമുറ സ്വീകരിക്കുമെന്ന പ്രതീക്ഷയിലാണ് അണിയറക്കാര്. ജൂലൈ 26 ന് ചിത്രം തിയറ്ററുകളില് എത്തും.
