പിണറായി വിജയന് പ്രതിപക്ഷനേതൃസ്ഥാനം രാജിവയ്ക്കണമെന്ന് ബിജെപി നേതാവും കേസിലെ പരാതിക്കാരനുമായ ഷോണ്‍ ജോര്‍ജ്. സിഎംആര്‍എല്‍ – എക്‌സാലോജിക് കേസുമായി ബന്ധപ്പെട്ടാണ് പ്രതികരണം. ഹവാല ഇടപാട് പോലും പുറത്തുവന്നുവെന്നും ഉളുപ്പ് ഉണ്ടെങ്കില്‍ പിണറായി രാജിവയ്ക്കണമെന്നും അദ്ദേഹം പറഞ്ഞു.
പിണറായി വിജയന് വൈദ്യുതി മന്ത്രിയായിരുന്നപ്പോള്‍ മുതല്‍ തുടങ്ങിയ അഴിമതിയാണ്. ഈ അഴിമതികള്‍ക്ക് കുടപിടിക്കാന്‍ തുടങ്ങിയതാണ് വീണയുടെ സ്ഥാപനങ്ങള്‍. ഗള്‍ഫില്‍ നിന്ന് പണം പോയത് അമേരിക്കയിലേക്കാണ്. യാതൊരു സേവനവും നല്‍കാതെ വീണ കൈപ്പറ്റിയ മുഴുവന്‍ പണവും പിണറായി വിജയന്റേതാണ്. പിണറായി വിജയന് കൊടുത്ത കൈക്കൂലിയാണ്. ഈ നാടിനെ വിറ്റതാണ്. തോറിയം ഈ നാട്ടില്‍ നിന്ന് കടത്തപ്പെട്ടിട്ടുണ്ടെങ്കില്‍ നിങ്ങള്‍ ഇപ്പോള്‍ കാണുന്നത് ഒരു മഞ്ഞുമലയുടെ അറ്റം മാത്രമാണ് – അദ്ദേഹം പറഞ്ഞു.
ഹവാല പണം കടത്തിയിട്ടുണ്ടെങ്കില്‍ സ്വപ്‌ന സുരേഷ് പറഞ്ഞ മുഴുവന്‍ കാര്യങ്ങളും ശരിയാണെന്ന് അദ്ദേഹം പറഞ്ഞു. ഈ കാലഘട്ടത്തില്‍ ഉയര്‍ന്നുവന്നിട്ടുള്ള ആരോപണങ്ങള്‍ ഒക്കെ ശരി വെക്കുന്നതാണ് ഇപ്പോള്‍ പുറത്ത് വന്നിട്ടുള്ള തെളിവുകള്‍. അന്വേഷണം ശരിയായ ദിശയിലാണ്. ഇഡി ഔദ്യോഗികമായി പത്രകുറിപ്പ് ഇറക്കിയതാണ്. പിണറായിയെ മാറ്റിനിര്‍ത്താന്‍ സിപിഐഎം തയാറാകണം. മുഹമ്മദ് റിയാസുമായി ബന്ധപ്പെട്ടല്ല റെയ്ഡ്. വീണയുമായി നടത്തിയ സമ്പത്തിക ഇടപാടുകളിലാണ്. റിയാസുമായി ബന്ധപെട്ട് കോഴിക്കോട് വലിയ ലോബി പ്രവര്‍ത്തിക്കുന്നു- ഷോണ്‍ പറഞ്ഞു.
