പത്തനംതിട്ട അടൂര് നിയോജകമണ്ഡലം യുഡിഎഫ് സ്ഥാനാര്ഥിക്കെതിരെ ലഘുലേഖ വിതരണം ചെയ്തതുമായി ബന്ധപ്പെട്ട് രാഷ്ട്രീയ വിവാദം. യുഡിഎഫ് സ്ഥാനാര്ഥി സി വി ശാന്തകുമാര് കൊലക്കേസ് പ്രതിയാണെന്ന് എഴുതിയുള്ള ലഘുലേഖയാണ് വിതരണം ചെയ്തത്. വിവിധ പൊലീസ് സ്റ്റേഷനുകളിലായി അഞ്ച് സിപിഐ പ്രവര്ത്തകരെ കസ്റ്റഡിയിലെടുത്തു. ചിറ്റയം ഗോപകുമാര് അടൂര് പൊലീസ് സ്റ്റേഷനിലെത്തി ഉപരോധിച്ചതിന് പിന്നാലെ പ്രവര്ത്തകരെ ഇറക്കിവിട്ടു. തന്നെ ഇല്ലാതാക്കാനാണ് എല്ഡിഎഫിന്റെ ശ്രമമെന്ന് സി വി ശാന്തകുമാര് പറഞ്ഞു.
കൊലക്കേസ് പ്രതി സ്ഥാനാര്ഥി എന്ന തലക്കെട്ടൊടെയായിരുന്നു മണ്ഡലത്തില് ഉടനീളം യുഡിഎഫ് സ്ഥാനാര്ഥി സിവി ശാന്തകുമാറിനെതിരെ ലഘുലേഖ വിതരണം ചെയ്തത്. ഇതിനെതിരെ സി വി ശാന്തകുമാര് പരാതി നല്കിയിരുന്നു. ലഘുലേഖ വിതരണം ചെയ്ത സംഭവത്തില് സിപിഐ പ്രവര്ത്തകരെ പൊലീസ് അറസ്റ്റ് ചെയ്തു. സിപിഐ പ്രവര്ത്തകര് ലഹളയ്ക്ക് ശ്രമിച്ചെന്നായിരുന്നു എഫ്ഐആര്. വ്യാജ നോട്ടീസ് വിതരണം ചെയ്തു സംഘര്ഷം ഉണ്ടാക്കാന് ശ്രമിച്ചെന്നും എഫ്ഐആറില് പറയുന്നു. പ്രവര്ത്തകരെ വിട്ടുതരണമെന്ന് ആവശ്യപ്പെട്ട് ഗോപകുമാറിന്റെ നേതൃത്വത്തില് സിപിഐ പ്രവര്ത്തകര് പൊലീസ് സ്റ്റേഷനില് പ്രതിഷേധിച്ചു.
എല്ഡിഎഫിന്റെ പ്രവര്ത്തകര് ആരുമല്ല ലഘുലേഖ വിതരണം ചെയ്തതെന്ന് ചിറ്റയം ഗോപകുമാര് പറഞ്ഞു. തന്നെ ഇല്ലാതാക്കാന് ശ്രമിക്കുന്നുവെന്ന് പൊട്ടിക്കരഞ്ഞ് സി വി ശാന്തകുമാര് പ്രതികരിച്ചു. ഒരു കേസ് പോലും തനിക്കെതിരെ ഇല്ലെന്നും ശാന്തകുമാര് പറഞ്ഞു.
എല്ഡിഎഫും യുഡിഎഫും പൊറാട്ട് നാടകം കളിക്കുകയാണെന്നായിരുന്നു ബിജെപി സ്ഥാനാര്ഥി പന്തളം പ്രതാപന്റെ പരിഹാസം. സംഭവത്തില് തെരഞ്ഞെടുപ്പ് കമ്മീഷനെ സമീപിച്ച് നിയമപരമായി മുന്നോട്ടുപോകാനാണ് മുന്നണികളുടെ തീരുമാനം. ലഘുലേഖ പ്രിന്റ് ചെയ്ത പ്രസിനെക്കുറിച്ച് അന്വേഷിച്ച് കേസെടുക്കാനും ജില്ലാ കളക്ടര് പൊലീസിന് നിര്ദ്ദേശങ്ങള് നല്കി.
