ജൂലൈയിലെ ബജറ്റവതരണത്തില്‍ ‘തരുണ്‍ പ്ലസ്’ എന്ന വിഭാഗത്തിലെ മുദ്രാ വായ്പാ പദ്ധതി ഉയര്‍ത്തിയതായി കേന്ദ്ര ധനമന്ത്രി നിര്‍മല സീതാരാമന്‍ പ്രഖ്യാപിച്ചിരുന്നു. ഇത് പ്രാബല്യത്തിലാക്കിക്കൊണ്ട് ധനമന്ത്രാലയം ഉത്തരവിറക്കി. വായ്പാ പരിധി 10 ലക്ഷത്തില്‍ നിന്ന് 20 ലക്ഷമാക്കിയാണ് ഉയര്‍ത്തിയത്. സംരംഭകര്‍ക്ക് ബിസിനസ് വികസനത്തിനായി തുക ഉപയോഗിക്കാം. മുന്‍ വായ്പകള്‍ കൃത്യമായി തിരിച്ചടച്ച, തരുണ്‍ വിഭാഗത്തില്‍ വരുന്ന സംരംഭകര്‍ക്കാണ് കൂടിയ തുക വായ്പ നല്‍കുന്നത്.
2015 ഏപ്രില്‍ എട്ടിനാണ് പ്രധാനമന്ത്രി മുദ്ര യോജന ആരംഭിച്ചത്. കോര്‍പറേറ്റിതര- കൃഷിയിതര സൂക്ഷ്മസംരംഭകര്‍ക്കാണ് വായ്പ ലഭിക്കുന്നത്. മൂന്ന് വിഭാഗങ്ങളിലായാണ് വായ്പ ലഭിക്കുന്നത്. 50,000 രൂപ വരെ ശിശു വിഭാഗത്തിലും 50,000 മുതല്‍ 5 ലക്ഷം വരെ കിഷോര്‍ വിഭാഗത്തിലും 10 ലക്ഷം രൂപ തരുണ്‍ വിഭാഗത്തിലും ലഭിക്കുന്നതാണ് നിലവിലെ രീതി.
സര്‍ക്കാര്‍ കണക്കുകള്‍ പ്രകാരം 5.4 ലക്ഷം കോടിയാണ് 66.8 മില്യണ്‍ വായ്പകളിലൂടെ 2023-24 കാലയളവില്‍ വിതരണം ചെയ്തത്. തുടക്കം മുതല്‍ 2024 ജൂണ്‍ വരെ 29.79 ലക്ഷം കോടി രൂപയുടെ 487.8 മില്യണ്‍ വായ്പകള്‍ നല്‍കി. മുദ്ര ലോണുകളിലെ നിഷ്‌ക്രിയാസ്തി 3.4 ശതമാനമായി 2024 വര്‍ഷത്തില്‍ കുറഞ്ഞു.
