കെഎസ്ആര്ടിസിയില് ഐഎന്ടിയുസി യൂണിയനുകളുടെ കൂട്ടായ്മയായ ടിഡിഎഫിന്റെ പണിമുടക്ക് ഇന്ന് അര്ധരാത്രി ആരംഭിക്കും. പണിമുടക്ക് ഒഴിവാക്കാന് കെ.എസ്.ആര്.ടി.സി സി.എം.ഡി പ്രമോജ് ശങ്കര് സംഘടന നേതാക്കളുമായി നടത്തിയ ചര്ച്ച പരാജയപ്പെട്ടതോടെയാണ് 24 മണിക്കൂര് സമരവുമായി മുന്നോട്ടു പോകാന് തീരുമാനിച്ചത്. സമരം കെഎസ്ആര്ടിസിയോടുള്ള സ്നേഹം കൊണ്ടല്ലെന്ന് ഗതാഗത മന്ത്രി കെ. ബി ഗണേഷ് കുമാര്.
12 ആവശ്യങ്ങള് ഉന്നയിച്ചാണ് 24 മണിക്കൂര് സമരം. എല്ലാ മാസവും ഒന്നാം തീയതി ശമ്പളം വിതരണം ചെയ്യണം എന്നുള്ളതാണ് പ്രധാന സമരാവശ്യം. ഡി.എ കുടിശ്ശിക പൂര്ണമായും അനുവദിക്കുക, ശമ്പള പരിഷ്കരണ കരാറിന്റെ സര്ക്കാര് ഉത്തരവ് ഇറക്കുക, ഡ്രൈവര്മാരുടെ സ്പെഷ്യല് അലവന്സ് കൃത്യമായി നല്കുക തുടങ്ങിയവയാണ് മറ്റ് പ്രധാന ആവശ്യങ്ങള്. സമരം ഒഴിവാക്കാന് കെഎസ്ആര്ടിസി സിഎംഡി പ്രമോജ് ശങ്കര് സംഘടന നേതാക്കളുമായി ചര്ച്ച നടത്തിയിരുന്നു. മുന്നോട്ടുവച്ച ആവശ്യങ്ങള് പരിഹരിക്കുമെന്ന് ഉറപ്പ് ലഭിക്കാതെ വന്നതോടെയാണ് പണിമുടക്കിലേക്ക് നീങ്ങിയത്. സമരത്തിനെതിരെ രൂക്ഷമായ ഭാഷയില് ഗതാഗത മന്ത്രി കെ.ബി ഗണേഷ് കുമാര് രംഗത്തെത്തി. കെഎസ്ആര്ടിസിയെ തകര്ക്കാനുള്ള ഗൂഢാലോചന എന്ന് മന്ത്രി വ്യക്തമാക്കി.
സമരം പൊതു ജനങ്ങളെ ബാധിക്കാനിടയുണ്ട്. 50 ശതമാനത്തിലധികം ബസുകള് നാളെ സര്വീസ് നടത്തില്ലെന്നാണ് സമരക്കാരുടെ അവകാശവാദം.
