ഐഎസ്എൽ മത്സരത്തിനിടയുണ്ടായ ആരാധക അതിക്രമത്തിൽ കൊൽക്കത്ത ക്ലബ്ബായ മുഹമ്മദൻ സ്പോർട്ടിംഗിന് പിഴ ശിക്ഷ. ഒരു ലക്ഷം രൂപയാണ് ഐ എസ് എൽ ഗവേർണിങ് ബോഡി പിഴ ചുമത്തിയത്. ആരാധകർ, കേരള ബ്ലാസ്റ്റേഴ്സിന്റെ താരങ്ങൾക്കും ആരാധകർക്കും നേരെ കുപ്പിയും വടിയും എറിഞ്ഞിരുന്നു. പ്രാഥമികമായാണ് ഒരു ലക്ഷം രൂപ പിഴ ചുമത്തിയിരിക്കുന്നത്
മുഹമ്മദൻ സ്പോർട്ടിംഗിന്റെ വിശദീകരണം തൃപ്തികരമായില്ലെങ്കിൽ കൂടുതൽ നടപടി ഉണ്ടാകും. നോട്ടീസിന് മറുപടി നൽകാൻ മൊഹമ്മദൻ സ്പോർട്ടിംഗിന് നാല് ദിവസമുണ്ട് മുഹമ്മദൻസ് സ്പോർട്ടിംഗ് ആരാധകർ ആക്രമിച്ച സംഭവത്തിൽ ഔദ്യോഗികമായി ഇന്ത്യൻ സൂപ്പർ ലീഗ് അധികൃതർക്ക്കേരള ബ്ലാസ്റ്റേഴ്സ് പരാതി നൽകിയിരുന്നു. മത്സരത്തിൽ മുഹമ്മദൻസ് സ്പോർട്ടിങിന് അനുകൂലമായി ലഭിച്ച പെനാൽറ്റി നിഷേധിക്കപ്പെട്ടതോടെയാണ് ആരാധകർ കേരള ബ്ലാസ്റ്റേഴ്സ് ആരാധകർക്കും കളിക്കാർക്കും നേരെ തിരിഞ്ഞത്.
ഗ്യാലറിയിൽ നിന്ന് വടികളും കുപ്പികളും എറിഞ്ഞതിന് പുറമെ പടക്കം പൊട്ടിക്കുക കൂടി ചെയ്തതോടെ മത്സരം നിർത്തിവെക്കേണ്ടി വന്നിരുന്നു. മത്സരം അവസാനിക്കാൻ നിമിഷങ്ങൾ മാത്രം ശേഷിക്കെയായിരുന്നു സ്റ്റേഡിയത്തിൽ മുഹമ്മദൻ സ്പോർട്ടിംഗിന്റെ ആരാധകർ അതിക്രമം നടത്തിയത്. മത്സരം 2-1 എന്ന സ്കോറിൽ ബ്ലാസ്റ്റേഴ്സ് വിജയിച്ചിരുന്നു.മുഹമ്മദൻ സ്പോർട്ടിംഗിൻ്റെ ജനറൽ സെക്രട്ടറി ബിലാൽ അഹമ്മദ് ഖാൻ സംഭവങ്ങളെ അപലപിച്ചിരുന്നു.
