പ്രയാഗ്രാജിൽ നടന്നുകൊണ്ടിരിക്കുന്ന മഹാകുംഭമേളയിൽ പങ്കെടുത്ത് ഇൻഡിഗോ സിഇഒ പീറ്റർ എൽബേഴ്സ്. ത്രിവേണി സംഗമത്തിൽ പുണ്യസ്നാനം ചെയ്ത അദ്ദേഹം ജീവിതത്തിൽ ഒരിക്കൽ മാത്രം ലഭിക്കുന്ന അനുഭവമാണിതെന്ന് സോഷ്യൽ മീഡിയ പ്ലാറ്റ്ഫോമായ ലിങ്ക്ഡ് ഇന്നിൽ കുറിച്ചു.
“ഞാൻ മഹാ കുംഭമേളയിൽ പങ്കെടുത്തു, ഇന്ത്യയുടെ സംസ്കാരത്തിൻ്റെയും ആത്മീയതയുടെയും പൈതൃകത്തിൻ്റെയും സംഗമ സ്ഥാനമാണിത്. 144 വർഷത്തിലൊരിക്കൽ… ഭൂമിയിലെ മനുഷ്യരാശിയുടെ ഏറ്റവും വലിയ ഒത്തുചേരൽ. 45 ദിവസങ്ങൾക്കുള്ളിൽ 450 ദശലക്ഷം സന്ദർശകർ, പ്രയാഗ്രാജിലെ ഭക്തരുടെ ഒത്തുചേരലിന്റെ വ്യാപ്തി അളക്കാനാവുന്നതിനും അപ്പുറമാണെന്നും ഈ വർഷം മഹാകുംഭം സന്ദർശിക്കുന്നവരുടെ എണ്ണം അമേരിക്കയിലെ ജനസംഖ്യയേക്കാൾ കൂടുതലാണെന്നും” പീറ്റർ എൽബേഴ്സ് കുറിച്ചു.
“വാക്കിനോ വാക്യത്തിനോ ചിത്രത്തിനോ കുംഭമേളയിലെ ഊർജ്ജത്തെ ശരിയായി വിവരിക്കാൻ കഴിയില്ല. ഞാൻ പുലർച്ചെ 5 മണിക്ക് നദികളുടെ പുണ്യസംഗമത്തിൽ മുങ്ങി കുളിച്ചു. ദശലക്ഷക്കണക്കിന് ആളുകൾ ഒരേ സമയം, മന്ത്രങ്ങളും, പ്രാർത്ഥനകളുമായി ഒന്നിക്കുന്നൊരിടം. ജീവിതത്തിൽ ഒരിക്കൽ മാത്രം ലഭിക്കുന്ന ഒരു അനുഭവം, ഞാൻ എന്നെന്നേക്കുമായി വിലമതിക്കുന്ന ഒന്നാണിത്” അദ്ദേഹം പറഞ്ഞു.
ജനുവരി 16 നാണ് മഹാകുംഭമേള സന്ദർശിക്കാനായി 54 കാരനായ എൽബർസ് എത്തിയത്. മഹാകുംഭത്തിൽ പങ്കെടുത്ത ചിത്രങ്ങളും എൽബേഴ്സ് സാമൂഹ്യമാധ്യമത്തിലൂടെ പുറത്തുവിട്ടിരുന്നു. തിരക്കേറിയ സമയങ്ങളിൽ മികച്ച പ്രവർത്തനത്തിന് പ്രയാഗ്രാജ് വിമാനത്താവളത്തിലെ ഇൻഡിഗോ ടീമിന് നന്ദി പറഞ്ഞുകൊണ്ടാണ് അദ്ദേഹം കുറിപ്പ് അവസാനിപ്പിച്ചത്. 2022 മുതൽ ഇൻഡിഗോയുടെ തലപ്പത്ത് എൽബർസ് ഉണ്ട്. ഇൻഡിഗോയിൽ ചേരുന്നതിന് മുമ്പ്, നെതർലൻഡിന്റെ എയർലൈനായ KLM ന്റെ പ്രസിഡൻ്റും സിഇഒയും ആയിരുന്നു അദ്ദേഹം.
