അധികാരമേറിയ ശേഷമുള്ള ആദ്യ ഉപതിരഞ്ഞെടുപ്പില് നിറം മങ്ങി യുഡിഎഫ്. എംഎല്എമാരായി വിജയിച്ചവരുടെ സിറ്റിങ് സീറ്റുകള് നഷ്ടമായി. കോര്പ്പറേഷന് വാര്ഡുകള് നിലനിര്ത്തുമ്പോഴും ഭൂരിപക്ഷം കുറഞ്ഞത് ചര്ച്ചയാകും. കയ്യാങ്കളിയുണ്ടായ ചിറയിന്കീഴില് ബ്ലോക് പഞ്ചായത്ത് ഡിവിഷന് നഷ്ടമായതോടെ കോണ്ഗ്രസിനുള്ളിലെ തമ്മിലടി ഇനിയും തുടരും.
പാലക്കാട് ചിറ്റൂര് തത്തംമംഗലം നഗരസഭയിലെ പരുത്തിക്കാവ് സീറ്റില് വിജയിച്ച സുമേഷ് അച്യുതന് നിയമസഭയിലേക്ക് തിരഞ്ഞെടുക്കപ്പെട്ടതോടെയാണ് ഉപതിരഞ്ഞെടുപ്പിന് കളമൊരുങ്ങിയത്. എന്നാല്, വോട്ടെണ്ണിയപ്പോള് എല്ഡിഎഫിനും യുഡിഎഫിനും തുല്യം. നറുക്കെടുപ്പില് ഭാഗ്യം തുണച്ചത് എല്ഡിഎഫിനെയാണ്. കോട്ടയം തൃക്കൊടിത്താനം ഡിവിഷനില് അട്ടിമറിയാണുണ്ടായത്. വിനു ജോബ് എംഎല്എ ആയതോടെ നടന്ന ഉപതിരഞ്ഞെടുപ്പില് ജില്ലാ പഞ്ചായത്ത് യുഡിഎഫിന് നഷ്ടമായി.
ഇങ്ങനെ രണ്ട് യുഡിഎഫ് എംഎല്എമാര് മുമ്പ് വിജയിച്ച സീറ്റുകള് എല്ഡിഎഫ് പിടിച്ചെടുത്തു. കോഴിക്കോട് കോര്പ്പറേഷനിലെ കുറ്റിച്ചിറ വാര്ഡ് യുഡിഎഫ് നിലനിര്ത്തി. എന്നാല്, ഭൂരിപക്ഷത്തിലെ ഇടിവ് മുസ്ലിം ലീഗില് ചര്ച്ചയാകും. രണ്ടായിരത്തിലേറെ വോട്ടിന് ഫാത്തിമ തെഹ്ലിയ വിജയിച്ച കുറ്റിച്ചിറയില് 436 വോട്ടിന്റെ ഭൂരിപക്ഷത്തില് യുഡിഎഫ് കടന്നുകൂടി എന്ന് പറയാം.
കൊച്ചി കോര്പ്പറേഷനിലെ അയ്യപ്പന്കാവ് വാര്ഡില് ദീപക് ജോയിയുടെ പിന്ഗാമിയായി എത്തിയ എ കെ അജിത്കുമാര് 549 വോട്ടിന് വിജയിച്ചു.ആയിരത്തിലേറെ വോട്ടിന് ദീപക് ജോയി ജയിച്ച വാര്ഡാണിത്. കോണ്ഗ്രസിന് നാണക്കേടുണ്ടാക്കിയത് ചിറയിന്കീഴ് ബ്ലോക്ക് പഞ്ചായത്തിലെ അഞ്ചുതെങ്ങ് വാര്ഡിലെ തോല്വിയാണ്. രമ്യാ ഹരിദാസ് എംഎല്എ ഉള്പ്പെട്ട കോണ്ഗ്രസിലെ കയ്യാങ്കളി ഇവിടെ ഇനിയും ചര്ച്ചയാകും.
