തിരുവനന്തപുരം: കായിക വകുപ്പ് മന്ത്രിയും യൂത്ത് കോണ്‍ഗ്രസ് സംസ്ഥാന അധ്യക്ഷനുമായ ഒ.ജെ ജനീഷിനെതിരെ കണ്ണൂരില്‍ ഡി.വൈ.എഫ്.ഐ-സി.പി.ഐ .എംപ്രവർത്തകർ നടത്തിയ ആക്രമണം അംഗീകരിക്കാനാകില്ലെന്ന് മുഖ്യമന്ത്രി വി ഡി സതീശൻ. സി.പി.ഐ .എം നേതൃത്വത്തിന്റെ അറിവോടെയാണ് മന്ത്രിക്കെതിരെ ആക്രമണമുണ്ടായത്. ആക്രമണത്തിന് പിന്നിലെ ഗൂഡാലോചന വ്യക്തമാണ്. മന്ത്രിയെ ആക്രമിച്ച ക്രിമിനലുകളെയും ഗൂഡാലോചന നടത്തിയ സി.പി.ഐ .എം- ഡി.വൈ.എഫ്.ഐ നേതാക്കളെയും നിയമത്തിന് മുന്നില്‍ കൊണ്ടു വരിക തന്നെ ചെയ്യുമെന്നും അദ്ദേഹം പറഞ്ഞു.
മന്ത്രി ഒ ജെ ജനീഷിനെതിരായ സിപിഐഎം ആക്രമണം ഒരുതരത്തിലും വെച്ചുപൊറുപ്പിക്കാൻ ആകില്ല. ഒരു കാരണവുമില്ലാതെയാണ് മന്ത്രിയുടെ കാറിനു നേരെ ആക്രമണം നടന്നത് ജനശ്രദ്ധ തിരിച്ചുവിടാനുള്ള ശ്രമമാണ് സിപിഐഎമ്മിന്റേത്. കോൺഗ്രസ് നേതാക്കന്മാർക്കെതിരായും മന്ത്രിമാർക്കെതിരായും അക്രമം അഴിച്ചുവിട്ടുകൊണ്ടുവന്നാൽ സർക്കാർ കയ്യുംകെട്ടി നോക്കിയിരിക്കില്ലെന്ന് മുഖ്യമന്ത്രി പ്രതികരിച്ചു. സിപിഐഎം ബിജെപി നേതാക്കളുടെ ഒത്താശയോടെ സംസ്ഥാനത്ത് ആക്രമണം അഴിച്ചുവിടുന്നു
നിങ്ങൾ പരസ്പരം ആലോചിച്ചിട്ടാണോ ഒരുപോലെ സമരമാർഗ്ഗം ആരംഭിക്കുന്നതെന്ന് മുഖ്യമന്ത്രി ചോദിച്ചു. ക്രിമിനലുകളെ എങ്ങനെ കൈകാര്യം ചെയ്യണമെന്ന് സർക്കാരിനും പൊലീസിനും അറിയാം അക്രമ സംഭവങ്ങൾ കൊണ്ട് സർക്കാരിനെ താഴെയിറക്കാം എന്നോ ഭീഷണിപ്പെടുത്താമെന്നോ ആരും കരുതേണ്ടെന്നും മുഖ്യമന്ത്രി വി ഡി സതീശൻ വ്യക്തമാക്കി.
കണ്ണൂർ തളിപ്പറമ്പ് കുപ്പത്ത് വെച്ചാണ് ആക്രമണമുണ്ടായത്. വാഹനത്തിന് കേടുപാടുകൾ സംഭവിച്ചിട്ടുണ്ട്. പയ്യന്നൂരിൽ വെച്ചും ആക്രമണമുണ്ടായി. കല്ലുകൊണ്ടും കൈ കൊണ്ടും വാഹനത്തിന് മേൽ ആഞ്ഞടിച്ചു. കാസർഗോട്ടേയ്ക്കുള്ള യാത്രക്കിടെയാണ് ആക്രമണമുണ്ടായത്. പയ്യന്നൂര്‍ കഴിഞ്ഞതിന് പിന്നാലെ മൂന്നാമതും ഒജെ ജനീഷിൻ്റെ വാഹനത്തിന് നേരേ പ്രതിഷേധമുണ്ടായി. കാസർഗോഡ് നീലേശ്വരത്ത് മന്ത്രി ഒജെ ജനീഷിനെതിരെ ഡിവൈഎഫ്ഐ പ്രതിഷേധം നടത്തി. തളി ക്ഷേത്രത്തിന് സമീപത്ത് വച്ച് മന്ത്രിയെ കരിങ്കൊടി കാണിച്ചു.
