ഒരിടവേളക്കു ശേഷം സംസ്ഥാനത്ത് വീണ്ടും കാലവര്ഷം സജീവമാകുന്നു. ഇന്ന് മുതല് ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളില് യെല്ലോ മുന്നറിയിപ്പ് നല്കി.
തിരുവനന്തപുരം കൊല്ലം ഒഴികെയുള്ള എല്ലാ ജില്ലകളിലും മഴ മുന്നറിയിപ്പുണ്ട്. ഞായര്, തിങ്കള്. ചൊവ്വ ദിവസങ്ങളില് വടക്കന് കേരളത്തില് അതിശക്തമായ മഴയ്ക്കാണ് സാധ്യത പ്രവചിച്ചിരിക്കുന്നത്. മലയോര മേഖലകളില് മഴ കനത്തേക്കും. കേരള, കര്ണാടക ലക്ഷദ്വീപ് തീരങ്ങളില് മീന്പിടുത്തത്തിന് വിലക്കേര്പ്പെടുത്തി.
കള്ളക്കടല് പ്രതിഭാസത്തിന്റെ ഭാഗമായി തിരുവനന്തപുരം (കാപ്പില് മുതല് പൊഴിയൂര് വരെ) ജില്ലയിലെ തീരങ്ങളില് നാളെ (28/06/2026) രാവിലെ 05.30 വരെ 1.2 മുതല് 1.4 മീറ്റര് വരെ ഉയര്ന്ന തിരമാലകള് കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) അറിയിച്ചു.
അതേസമയം, ഉത്തരേന്ത്യന് സംസ്ഥാനങ്ങളില് കാലവര്ഷം ശക്തി പ്രാപിക്കും. ഗുജറാത്ത്, മധ്യപ്രദേശ്, ഛത്തീസ്ഗഡ്, ഉത്തരാഖണ്ഡ്, ജാര്ഖണ്ഡ്, ഉത്തര്പ്രദേശ് എന്നീ സംസ്ഥാനങ്ങളില് അടുത്ത നാല് ദിവസത്തിനുള്ളില് ശക്തമായ മഴ ലഭിക്കുമെന്ന് കാലാവസ്ഥ നിരീക്ഷണ കേന്ദ്രത്തിന്റെ പ്രവചനം. അരുണാചല് പ്രദേശിലും ഉത്തരാഖണ്ഡിലും അസമിലും കനത്ത മഴയില് വന്നാശനഷ്ടങ്ങള് റിപ്പോര്ട്ട് ചെയ്തിട്ടുണ്ട്. ഈ സംസ്ഥാനങ്ങളിലെ ജനങ്ങളോട് അതീവ ജാഗ്രത പുലര്ത്താനാണ് നിര്ദ്ദേശം. ശക്തമായ മഴ തുടര്ന്നാല് നദീതീരങ്ങളില് നിന്ന് മാറി താമസിക്കാന് ഇതിനോടകം നിര്ദേശം നല്കിയിട്ടുണ്ട്.
