യുദ്ധം അവസാനിപ്പിക്കാനുള്ള ഇറാന്റെ നിര്ദേശം അമേരിക്കന് പ്രസിഡന്റ് ഡോണള്ഡ് ട്രംപ് തള്ളിയതിനെതിരെ ഇറാന് വിദേശകാര്യ മന്ത്രാലയം. മേഖലയിലെ സുരക്ഷ തകര്ക്കപ്പെട്ടുവെന്ന് ഇറാന് വ്യക്തമാക്കി. അമേരിക്കയുടേത് യുക്തിരഹിതമായ ആവശ്യങ്ങളെന്നും യുദ്ധം ചെയ്യാന് നിര്ബന്ധിതരായാല് പോരാടുമെന്നും പറഞ്ഞു. നയതന്ത്രത്തിന് അവസരം ലഭിച്ചാല് പ്രയോജനപ്പെടുത്തും. ചര്ച്ചകള് ദേശീയ താല്പ്പര്യങ്ങളെ അടിസ്ഥാനമാക്കി മാത്രമെന്നും ഇറാന് വിദേശകാര്യ മന്ത്രാലയം വ്യക്തമാക്കി.
മേഖലയിലുടനീളം യുദ്ധം അവസാനിപ്പിക്കണമെന്നും ഹോര്മുസ് കടലിടുക്ക് സംബന്ധിച്ച് ചര്ച്ചകള് നടക്കണമെന്നുമാണ് ഇറാന്റെ ആവശ്യം.
ഇറാന് ഇതിനകം വലിയ പരാജയം ഏറ്റുവാങ്ങിയിട്ടുണ്ടെന്നും ചര്ച്ചകള് പരാജയപ്പെട്ടാല് സൈനിക നടപടികള് കടുപ്പിക്കുമെന്നുമാണ് ട്രംപ് നല്കിയ മുന്നറിയിപ്പ്. എന്നാല് ഹോര്മുസില് വിട്ടുവീഴ്ചക്കില്ലെന്ന മറുപടിയാണ് ഇറാന് അമേരിക്കക്ക് നല്കിയതെന്നാണ് സൂചന. മേഖലയിലുടനീളം പ്രത്യേകിച്ച് ലെബനോണില് അടക്കം യുദ്ധം അവസാനിപ്പിക്കണം, ഹോര്മുസ് കടലിടുക്ക് സംബന്ധിച്ച് ചര്ച്ചകള് നടക്കണം, തുടങ്ങിയ നിര്ദേശങ്ങളും ഇറാന് അമേരിക്കക്ക് നല്കിയിട്ടുണ്ട്. രാജ്യാന്തര തലത്തില് ഉറപ്പുകള് പാലിക്കപ്പെടണമെന്നും ഇറാന് ആവശ്യപ്പെട്ടിട്ടുണ്ട്.
