മഞ്ചേശ്വരത്ത് എൽഡിഎഫിന് വോട്ട് ചെയ്യുമെന്ന എസ്ഡിപിഐ പ്രാദേശിക നേതൃത്വത്തിന്റെ നിലപാടിനെ തള്ളാതെ എൽഡിഎഫ് സ്ഥാനാർഥി കെ ആർ ജയാനന്ദ. മണ്ഡലത്തിൽ ആരോടൊപ്പം നിൽക്കുമെന്ന് എസ്ഡിപിഐ സംസ്ഥാന നേതൃത്വം വ്യക്തമാക്കണം. നിലപാട് വ്യക്തമാക്കിയാൽ വോട്ട് സ്വീകരിക്കുന്ന കാര്യത്തിൽ മറുപടി നൽകും. കന്നഡ മാധ്യമങ്ങളിലെ വാർത്തകൾ മഞ്ചേശ്വരത്ത് വർഗീയ ധ്രുവീകരണം നടത്താൻ മുസ്ലിം ലീഗും ബിജെപിയും ആയുധമാക്കുന്നുവെന്നും കെ ആർ ജയാനന്ദ ട്വന്റിഫോറിനോട്.
എസ്ഡിപിഐ നോമിനേഷൻ പിൻവലിച്ചതിന്റെ കാരണം അറിയില്ല. കാരണം വ്യക്തമാക്കേണ്ടത് എസ്ഡിപിഐയാണെന്ന് കെ ആർ ജയാനന്ദ പറഞ്ഞു. വോട്ട് സ്വീകരിക്കുന്നതല്ല നിലപാടാണ് പ്രശ്നമെന്ന് അദേഹം പറഞ്ഞു. സംസ്ഥാന കമ്മിറ്റിയാണ് നിലപാട് വ്യക്തമാക്കേണ്ടത്. അത് നേതൃത്വം പറയുമെന്ന് കെ ആർ ജയാനന്ദ വ്യക്തമാക്കി.
അതേസമയം കേരളത്തിൽ എസ്ഡിപിഐ-സിപിഐഎം കൂട്ടുകെട്ടെന്ന് കോൺഗ്രസ് നേതാവ് രമേശ് ചെന്നിത്തല പറഞ്ഞു. എസ്ഡിപിഐ സംസ്ഥാന വ്യാപകമായി എൽഡിഎഫിന് പിന്തുണ നൽകുന്നുണ്ടെന്നും രമേശ് ചെന്നിത്തല പറഞ്ഞു.
