കൊറിയയുടെ ഏറ്റവും വലിയ ആക്ഷൻ സ്റ്റാർ ഡോൺ ലീ അഥവാ മാ സെങ് ദോക്ക് സന്ദീപ് റെഡ്ഡി വാങ്ക സംവിധാനം ചെയ്യുന്ന പ്രഭാസ് ചിത്രം സ്പിരിറ്റ് എന്ന ചിത്രത്തിൽ അഭിനയിക്കുമെന്ന് റിപ്പോർട്ട് ചെയ്ത് കൊറിയൻ മാധ്യമങ്ങൾ. ചിത്രത്തിൽ ഡോൺ ലീ വില്ലൻ കഥാപാത്രത്തെ അവതരിപ്പിക്കുമെന്ന് ‘മുകോ’ എന്ന കൊറിയൻ മാധ്യമം തങ്ങളുടെ എക്സ് അക്കൗണ്ടിലൂടെ അറിയിക്കുന്നു.
ഭീമൻ ശരീരം വെച്ച് അനായാസമായി ആക്ഷൻ രംഗങ്ങൾ കൈകാര്യം ചെയ്യുന്നത്കൊണ്ടും, രൂപത്തിലെ സാമ്യതകൾ കൊണ്ടും ഡോൺ ലീയെ മലയാളികൾ മോഹൻലാലുമായി താരതമ്യം ചെയ്യുകയും ‘കൊറിയൻ ലാലേട്ടൻ’ എന്ന് ചെല്ല പേരിട്ട വിളിക്കുകയും ചെയ്യാറുണ്ട്. ചിത്രത്തിൽ ഡോൺ ലീ എത്തുമെന്ന് 2 വർഷമായി റൂമറുകൾ ഉള്ളതിനാൽ, താരത്തിന്റെ ഇൻസ്റ്റാഗ്രാം അക്കൗണ്ടിലെ ചിത്രങ്ങൾക്ക് കീഴിൽ പ്രഭാസ് ആരാധകർ ഒത്തുകൂടാറുണ്ടായിരുന്നു.
ഒരിക്കൽ ഡോൺലീ പ്രഭാസിന്റെ ചിത്രം തന്റെ ഇൻസ്റ്റാഗ്രാം സ്റ്റോറിയിലൂടെ പങ്കുവെച്ചത് വൻ വാർത്തയായായിരുന്നു. അർജുൻ റെഡ്ഡി, കബീർ സിങ്, ആനിമൽ തുടങ്ങിയ ചിത്രങ്ങളിലൂടെ ശ്രദ്ധേയനായ സന്ദീപ് റെഡ്ഡി വാങ്ക സ്പിരിറ്റ് ഡാർക്ക് ക്രൈം ത്രില്ലർ സ്വഭാവത്തിലാണ് ഒരുക്കുന്നതെന്നാണ് റിപ്പോർട്ടുകൾ.
ഇതിനകം റിലീസ് ചെയ്തിട്ടുള്ള ദൃശ്യങ്ങളില്ലാതെ ശബ്ദം മാത്രമുള്ള സ്പിരിറ്റിന്റെ ടൈറ്റിൽ ടീസറിൽ പ്രഭാസ്, പ്രകാശ് രാജ് എന്നിവരുടെ ശബ്ദ സാന്നിധ്യമുണ്ടായിരുന്നു. ചിത്രത്തിൽ പ്രഭാസ് IPS ഉദ്യോഗസ്ഥനായാണ് എത്തുന്നത്. ബാഹുബലി, സലാർ, കൽക്കി 2898 തുടങ്ങിയ ചിത്രങ്ങളിലൂടെ രാജ്യത്തെ ഏറ്റവും വിലയേറിയ താരമായി മാറിയ പ്രഭാസ്, സ്പിരിറ്റിലൂടെ അന്തർദേശീയ ശ്രദ്ധ നേടുമെന്നാണ് ആരാധകരുടെ പ്രതീക്ഷ.
