ശബരിമലയിൽ വെര്ച്വല് ക്യൂവിനോടൊപ്പം കെ.എസ്.ആര്.ടി.സി ഓണ്ലൈന് ടിക്കറ്റും നൽകും. ദര്ശനം ബുക്ക് ചെയ്യുമ്പോള് ടിക്കറ്റെടുക്കാനുള്ള ലിങ്കും അതിനൊപ്പം നൽകും. 40 പേരില് കുറയാത്ത സംഘത്തിന് 10 ദിവസം മുമ്പ് സീറ്റ് ബുക്ക് ചെയ്യാനാകും. തീര്ത്ഥാടനത്തിന്റെ ആദ്യ ഘട്ടത്തില് 383 ബസും രണ്ടാം ഘട്ടത്തില് 550 ബസുകളുമാണ് ക്രമീകരിച്ചിരിക്കുന്നത്.
ശബരിമല ഒരുക്കങ്ങളുടെ അവലോകനത്തിനായി പമ്പ ശ്രീരാമ സാകേതം ഹാളില് ഗതാഗത വകുപ്പു മന്ത്രി ഗണേഷ് കുമാറിന്റെ നേതൃത്വത്തില് ചേര്ന്ന യോഗത്തിലാണ് തീരുമാനം. അര മിനിറ്റ് ഇടവിട്ട് 200 ബസുകള് നിലക്കല്- പമ്പ സര്വീസ് നടത്തും. ത്രിവേണി യു ടേണ്, നിലയ്ക്കല് സ്റ്റേഷനുകളില് ഭക്തജനങ്ങള്ക്ക് ബസില് കയറാന് പാര്ക്കിങ്ങ് സ്ഥലത്ത് തന്നെ ബാരിക്കേഡ് സ്ഥാപിക്കും. പമ്പ യു ടേണ് മുതല് കെ.എസ്.ആര്.ടി.സി ബസ് സ്റ്റേഷന് വരെ റോഡിന്റെ ഇരുവശങ്ങളിലും സ്വകാര്യവാഹനങ്ങളുടെ നിയമവിരുദ്ധ പാര്ക്കിങ്ങ് നിരോധിക്കും.
നിലയ്ക്കല് ടോളില് ഫാസ്റ്റ് ടാഗ് സംവിധാനം ഏര്പ്പെടുത്തും. ഓട്ടോമേറ്റഡ് വെഹിക്കിള് കൗണ്ടിങ്ങ് സിസ്റ്റം, ഓട്ടോമേറ്റഡ് വെഹിക്കിള് നമ്പര് പ്ലേറ്റ് ഡിറ്റക്ഷന് സിസ്റ്റം എന്നിവ സജ്ജമാക്കും. ശബരിമലയില് എത്തുന്ന വാഹനങ്ങളുടെ കൃത്യമായ എണ്ണം ഇതോടെ ലഭ്യമാകും.
