ശാസ്ത്രം, സാങ്കേതികവിദ്യ, എഞ്ചിനീയറിംഗ്, ഗണിതം (STEM) എന്നീ മേഖലകളിൽ സ്ത്രീകളുടെയും പെൺകുട്ടികളുടെയും ശ്രദ്ധേയമായ നേട്ടങ്ങളെയും സംഭാവനകളെയും അംഗീകരിക്കുന്നതിനായി ഫെബ്രുവരി 11 ന് അന്താരാഷ്ട്ര ശാസ്ത്ര വനിതാ ദിനമായി ആഘോഷിക്കുന്നു. ഇങ്ങനെയൊരു ദിവസത്തെപ്പറ്റി അധികമാർക്കും അറിയില്ലയെന്നതാണ് വാസ്തവം. ഇത്തവണ പത്താമത്തെ അന്താരാഷ്ട്ര ശാസ്ത്ര വനിതാ ദിനമാണ് ആഘോഷിക്കപ്പെടുന്നത്. [International Day of Women and Girls in Science]
2015 ൽ ഐക്യരാഷ്ട്രസഭ ഫെബ്രുവരി 11 അന്താരാഷ്ട്ര ശാസ്ത്ര വനിതാ-പെൺകുട്ടി ദിനമായി പ്രഖ്യാപിച്ചു. ലിംഗസമത്വം എന്ന ലക്ഷ്യം കൈവരിക്കുന്നതിനും ശാസ്ത്രീയ, സാങ്കേതിക, ഗണിത പഠനങ്ങളിൽ പെൺകുട്ടികൾക്കും സ്ത്രീകൾക്കും പ്രവേശനം നൽകുന്നതിനുമായി ഈ ദിനം ആഘോഷിക്കാൻ പ്രഖ്യാപിച്ചു. ഉന്നത വിദ്യാഭ്യാസത്തിൽ സ്ത്രീകളുടെ പങ്കാളിത്തം ഉയർത്തുന്നതിന് മാതൃകാപരമായ നടപടികൾ സ്വീകരിച്ചിട്ടുണ്ടെങ്കിലും, ഈ മേഖലകളിൽ സ്ത്രീകൾക്ക് ഇപ്പോഴും പ്രാതിനിധ്യം കുറവാണ്.
“STEM കരിയറുകളെക്കുറിച്ചുള്ള അറിവ്: ശാസ്ത്രത്തിലെ അവളുടെ ശബ്ദം” എന്നതാണ് പത്താം അന്താരാഷ്ട്ര ശാസ്ത്ര വനിതാ ദിനത്തിന്റെ പ്രമേയം. ഈ വർഷത്തെ അന്താരാഷ്ട്ര ശാസ്ത്ര വനിതാ ദിനത്തിന്റെ ശ്രദ്ധാകേന്ദ്രം സ്റ്റീരിയോടൈപ്പുകൾ ഉപേക്ഷിച്ച് പെൺകുട്ടികളെ പ്രോത്സാഹിപ്പിക്കുക എന്നതാണ്.
