സിപിഐഎം മുഖപത്രമായ ദേശാഭിമാനിയില്‍ അസാധാരണ നടപടി. വാരാന്തപതിപ്പിന്റെ ചുമതല വഹിച്ചിരുന്ന ന്യൂസ് എഡിറ്ററുടെ മുറി പൂട്ടി. കമ്പ്യൂട്ടര്‍ ഉള്‍പ്പെടെയുള്ളവ പരിശോധിക്കുന്നതിനാണ് മുറി പൂട്ടിയത് എന്നാണ് വിശദീകരണം. ന്യൂസ് എഡിറ്റര്‍ താക്കോല്‍ ആവശ്യപ്പെട്ടിട്ടും നല്‍കിയില്ലെന്നും വിവരമുണ്ട്. (room of the News Editor in charge of the weekly has been locked in desabhimani)
‘കള്ളന്‍ വിജയന്’ ലേഖന വിവാദത്തിന് പിന്നാലെയാണ് ദേശാഭിമാനിയില്‍ ഈ അസാധാരണ നടപടി എന്നത് ശ്രദ്ധേയമാണ്. ന്യൂസ് എഡിറ്റര്‍ കെ ആര് അജയന്റെ മുറിയാണ് പൂട്ടിയിട്ട നിലയിലുള്ളത്. ഇദ്ദേഹം രാവിലെ ജോലിക്കെത്തിയപ്പോള്‍ മുറി പൂട്ടിക്കിടക്കുകയായിരുന്നു. സാധാരണ ഈ മുറി പൂട്ടാറില്ലെന്നും ഇത് അടയ്ക്കുകയും തുറക്കുകയും ചെയ്യുന്നത് ഉള്‍പ്പെടെ അജയന്‍ തന്നെയാണെന്നുമാണ് ദേശാഭിമാനി ജീവനക്കാരില്‍ നിന്ന് ലഭിക്കുന്ന വിവരം. ലേഖന വിവാദവുമായി ബന്ധപ്പെട്ട് തന്നെയാണ് ഈ നടപടിയെന്നാണ് ദേശാഭിമാനിയുമായി ബന്ധപ്പെട്ടവര്‍ പറയുന്നത്.
ദേശാഭിമാനി വാരാന്തപ്പതിപ്പ് വിവാദം അന്വേഷിക്കാന്‍ സിപിഐഎം തീരുമാനിച്ചിരുന്നു. ഇതിന്റെ ഭാഗമായാണോ കമ്പ്യൂട്ടര്‍ പരിശോധിക്കുക എന്നും സംശയമുണ്ട്. പരിശോധനകള്‍ കഴിയുന്നത് വരെ മുറി പൂട്ടിയിടാനാണ് നിര്‍ദേശം. അതേസമയം ചര്‍ച്ചയായ കള്ളന്‍ വിജയന് ലേഖനം എഴുത്തുകാരന്‍ ഫേസ്ബുക്കിലൂടെ പ്രസിദ്ധീകരിച്ചു.
