പതിവുതെറ്റിക്കാതെ ഈ റമദാന് മാസത്തിലും ജീവകാരുണ്യ പ്രവര്ത്തനങ്ങള്ക്കായി നല്ലൊരു തുക നീക്കിവച്ച് മാതൃകയായി ലുലു ഗ്രൂപ്പ്. പത്തനാപുരം ഗാന്ധിഭവനും കൊല്ലത്തെ പുവര് ഹോമും അടക്കം നിരാലംബരായ മനുഷ്യര്ക്ക് അഭയമായ സംസ്ഥാനത്തെ വിവിധ സ്ഥാപനങ്ങള്ക്കാണ് ലുലു ഗ്രൂപ്പ് ഇത്തവണയും സഹായമെത്തിച്ചിരിക്കുന്നത്. സംസ്ഥാനത്തെ വിവിധ സ്ഥാപനങ്ങള്ക്കായി രണ്ടരകോടിയുടെ സഹായമാണ് ലുലു ഗ്രൂപ്പ് നല്കിയിരിക്കുന്നത്. ഗാന്ധിഭവനിലെ അന്തേവാസികള്ക്കായി ഒരു കോടി രൂപയുടെ സഹായം കൈമാറി. എല്ലാവര്ക്കും സമൃദ്ധമായ ഭക്ഷണം നല്കുന്നതിനും മരുന്നിനും ചികിത്സയ്ക്കുമായാണ് തുക കൈമാറിയത്. ആയിരത്തഞ്ഞൂറിലേറെ അന്തേവാസികളാണ് പത്തനാപുരം ഗാന്ധിഭവനിലുള്ളത്.
കഴക്കൂട്ടം മാജിക് പ്ലാനറ്റില് പ്രവര്ത്തിക്കുന്ന ഡിഫറന്റ് ആര്ട്ട് സെന്ററിന് എം.എ യൂസഫലി പതിവ് തെറ്റിക്കാതെ സഹായം എത്തിച്ചു. ഒരു കോടി രൂപയുടെ സഹായമാണ് കൈമാറിയത്. സെന്ററിന്റെ പ്രവര്ത്തനങ്ങള്ക്കും ഭിന്നശേഷിക്കാരായ കുട്ടികളുടെ ക്ഷേമത്തിനുമായി നല്കുന്ന സഹായത്തിന്റെ തുടര്ച്ചയായാണ് ഈ തുക. പോത്തന്കോട് ശാന്തിഗിരി ആശ്രമത്തില് നടത്തിവരുന്ന അന്നദാനത്തിനായി പുണ്യ റമദാന് മാസത്തില് ഇരുപത്തിയഞ്ച് ലക്ഷം രൂപയുടെ സഹായം അദ്ദേഹം നല്കി. തുടര്ച്ചയായി നാലാം വര്ഷവും മുടക്കമില്ലാതെയാണ് ശാന്തിഗിരി ആശ്രമത്തിലേക്ക് സഹായം എത്തിച്ചത്. ജാതി മത ഭേദമന്യേ ഓരോ ദിവസവും ആയിരക്കണക്കിനാളുകള്ക്ക് ശാന്തിഗിരിയില് അന്നദാനം നല്കുന്നുണ്ട്.
കൊല്ലം മുണ്ടയ്ക്കല് പുവര്ഹോമിലെ നിലാരംബരായ അന്തേവാസികളെ ചേര്ത്ത് പിടിച്ച് പത്താം വര്ഷവും യൂസഫലി സഹായം എത്തിച്ചു. പുവര്ഹോമിലെ കുടുംബാംഗങ്ങള്ക്കുള്ള റമദാന് സമ്മാനമായി 25 ലക്ഷം രൂപയുടെ ധനസഹായമാണ് യൂസഫലി കൈമാറിയത്. പുവര്ഹോമില് സ്ത്രീകളും പുരുഷന്മാരുമടക്കം ആകെ 81 അന്തേവാസികളാണുള്ളത്. എല്ലാവരുടെയും ഭക്ഷണത്തിനും, അടിസ്ഥാന സൗകര്യം മെച്ചപ്പെടുത്താനും, ശുചിമുറികള്, ചികിത്സാ സൗകര്യങ്ങള്, മാനസികോല്ലാസത്തിനുള്ള സൗകര്യങ്ങള് എന്നിവ ഒരുക്കുന്നതിനുമായാണ് പത്താം വര്ഷവും മുടക്കമില്ലാതെ യൂസഫലി സഹായം നല്കിയത്. എം.എ യൂസഫലിക്ക് വേണ്ടി ലുലു ഗ്രൂപ്പ് ഡയറക്ടര് ജോയി ഷഡാനന്ദന്, ലുലു ഗ്രൂപ്പ് ഇന്ത്യ മീഡിയ ഹെഡ് എന്.ബി സ്വരാജ് എന്നിവര് ചേര്ന്ന് വിവിധ സ്ഥാപനങ്ങളിലേക്കുള്ള ധനസഹായങ്ങള് കൈമാറി.
