നെല്ല് സംഭരണത്തിന് സഹകരണ- കർഷക കേന്ദ്രീകൃത ബദലുമായി സംസ്ഥാന സർക്കാർ. കാർഷിക സഹകരണ സംഘങ്ങളെ ഉപയോഗിച്ച് നെല്ല് സംഭരണം നടത്തും. മുഖ്യമന്ത്രിയുടെ അധ്യക്ഷതയിൽ ചേർന്ന യോഗത്തിലാണ് തീരുമാനം. തുടർനടപടികൾക്കായി ചീഫ് സെക്രട്ടറിയേയും ബന്ധപ്പെട്ട വകുപ്പ് സെക്രട്ടറിമാരെയും ചുമതലപ്പെടുത്തി.
വരുന്ന സീസണില് തന്നെ ഈ സംവിധാനം നിലവില് കൊണ്ടുവരാനാണ് സര്ക്കാര് തീരുമാനം. പ്രാഥമിക കാർഷിക സഹകരണ സംഘങ്ങൾ കർഷകരിൽ നിന്ന് നേരിട്ട് നെല്ല് സംഭരിക്കും. പി.ആർ.എസ് അധിഷ്ഠിത വായ്പകളെ ആശ്രയിക്കുന്നത് ഒഴിവാക്കും. കർഷകർക്ക് നെല്ലിന്റെ പണം എത്രയും വേഗം നൽകും. അതിന് കഴിയാത്ത സഹകരണ സംഘങ്ങളുണ്ടെങ്കിൽ കേരള ബാങ്ക് വഴി സാമ്പത്തിക സഹായം ലഭ്യമാക്കാനും തീരുമാനമായി.
കാർഷിക സഹകരണ സംഘങ്ങളെ ഉൾപ്പെടുത്തി നെല്ല് സംഭരണത്തിൽ കാര്യക്ഷമതയും കർഷകർക്ക് കാലതാമസമില്ലാതെ സഹായം ലഭ്യമാക്കുന്നതിനുള്ള ക്രമീകരണവുമാണ് സംസ്ഥാന സർക്കാർ തീരുമാനിച്ചിരിക്കുന്നത്. ഇന്ന് ചേർന്ന യോഗത്തിൽ ബന്ധപ്പെട്ട വകുപ്പ് മന്ത്രിമാരും ഉദ്യോഗസ്ഥരും പങ്കെടുത്തിരുന്നു. മുഖ്യമന്ത്രിയുടെ കോണ്ഫറന്സ് ഹാളിലാണ് യോഗം നടന്നത്.
