20 കോടി രൂപയുടെ ക്രിസ്മസ് ബമ്പറടിച്ച ലോട്ടറി ടിക്കറ്റ് നഷ്ടപ്പെട്ടെന്ന് പരാതി. എറണാകുളം പാഴൂര് സ്വദേശിയായ റിട്ട. എഎസ്ഐ കെ.കെ സജിമോനാണ് പരാതിയുമായി പോലീസിനെയും കോടതിയെയും സമീപിച്ചത്. ജനുവരി 24 ന് നടന്ന നറുക്കെടുപ്പില് ഒന്നാം സമ്മാനം ലഭിച്ച ടിക്കറ്റിനാണ് സജിമോന് അവകാശം ഉന്നയിച്ചിരിക്കുന്നത്. XC 138455 നമ്പരിലുള്ള ടിക്കറ്റാണ് കാണാതായിരിക്കുന്നത്. (20 crore Kerala Christmas bumper ticket lost says retired ASI )
.ഡിസംബര് ഒന്നിന് കാഞ്ഞിരപ്പള്ളിയില് നിന്ന് എടുത്ത ടിക്കറ്റാണിതെന്നാണ് സജിമോന്റെ അവകാശവാദം. താന് വിശാഖപട്ടണത്തേക്ക് അയയ്ക്കാനായി ഒരു കൊറിയര് സ്ഥാപനത്തിലെത്തിച്ച കിറ്റില് ലോട്ടറി കുടുങ്ങിപ്പോയെന്നാണ് സജിമോന്റെ സംശയം. ഇതിന്റെ അടിസ്ഥാനത്തില് കൊറിയര് സ്ഥാപനത്തിലെ സിസിടിവി ദൃശ്യങ്ങള് ഉള്പ്പെടെ കേന്ദ്രീകരിച്ചാണ് അന്വേഷണം നടക്കുന്നത്. മറ്റൊരാള് കൂടി ക്രിസ്മസ് ബമ്പര് ലോട്ടറി നഷ്ടമായെന്ന് അവകാശവാദം ഉന്നയിച്ചിരുന്നു. ലോട്ടറി തന്റേതെന്ന് തെളിയിക്കാനാവശ്യമായ രേഖകളും മറ്റും കൈയിലുണ്ടെന്നാണ് സജിമോന് പറയുന്നത്.
എഎസ്ഐയായിരുന്ന സജി ജോലിയില് നിന്ന് വിരമിച്ച ശേഷം ട്രാവല്സ് നടത്തിവരികയായിരുന്നു. വിശാഖപട്ടണം സ്വദേശികള് ശബരിമലയില് പോകാനായി സജിയുടെ വാഹനമാണ് ബുക്ക് ചെയ്തിരുന്നത്. ശബരിമല ദര്ശനത്തിന് ശേഷം ശേഷം നാട്ടിലേക്ക് തിരികെപ്പോയ അവര് തങ്ങളുടെ നെയ്യ്പാത്രം ബസില് മറന്നുവച്ചു. ഇത് താനവര്ക്ക് കൊറിയര് ചെയ്തെന്നും പാത്രം ഇട്ടുവച്ച കിറ്റില് ടിക്കറ്റ് ഉണ്ടെന്നുമാണ് സജി പറയുന്നത്. ലോട്ടറിയെക്കുറിച്ച് ഓര്മ വന്നയുടന് കൊറിയര് സ്ഥാപനവുമായി ബന്ധപ്പെട്ടെങ്കിലും അവര് ഡെലിവറി നടത്തിക്കഴിഞ്ഞിരുന്നു. ടിക്കറ്റ് കൈയിലില്ലെന്നാണ് വിശാഖപട്ടണം സ്വദേശികളും പറഞ്ഞത്. അതിനാല് ടിക്കറ്റ് കൊറിയര് സ്ഥാപനത്തില് നഷ്ടപ്പെട്ടുകാണുമെന്നും അന്വേഷിക്കണമെന്നുമാണ് സജിമോന്റെ ആവശ്യം.
