മെഗാസ്റ്റാർ മമ്മൂട്ടിയെ നായകനാക്കി ഗൗതം വാസുദേവ് മേനോൻ സംവിധാനം ചെയ്ത ‘ഡൊമിനിക് ആൻഡ് ദ ലേഡീസ് പേഴ്സ്’ തിയേറ്ററുകളിൽ ശ്രദ്ധേയമായ പ്രകടനം തുടരുന്നു. 2025 ജനുവരി 23ന് റിലീസ് ചെയ്ത ചിത്രം ആദ്യ ദിനം തന്നെ 1.5 കോടി രൂപയുടെ നെറ്റ് കളക്ഷൻ നേടി. [ Dominic and the Ladies’ Purse]
തിയേറ്ററുകളിൽ പ്രേക്ഷകർ ചിത്രത്തെ ഏറ്റെടുത്തു കഴിഞ്ഞു. മമ്മൂട്ടിയുടെ അഭിനയം, ഗൗതം മേനോന്റെ സംവിധാനം, കോമഡി ഘടകങ്ങൾ എന്നിവയാണ് ചിത്രത്തിന്റെ പ്രധാന ആകർഷണങ്ങൾ. ചിത്രം പ്രേക്ഷകരിൽ നിന്ന് മികച്ച സ്വീകാര്യതയാണ് നേടുന്നത്. 2025ലെ മമ്മൂട്ടിയുടെ ആദ്യ റിലീസാണ് ‘ഡൊമിനിക് ആന്‍ഡ് ദി ലേഡീസ് പേഴ്സ്’.
സിനിമയുടെ വിജയത്തെ തുടർന്ന് സ്ക്രീനുകളുടെ എണ്ണവും വർധിപ്പിച്ചിട്ടുണ്ട്. 200ൽ നിന്ന് 225 സ്‌ക്രീനുകളിലേക്കാണ് ചിത്രത്തിന്റെ പ്രദർശനം വർധിപ്പിച്ചിരിക്കുന്നത്. അണിയറപ്രവർത്തകർ ഔദ്യോഗികമായി ഇക്കാര്യം അറിയിച്ചിട്ടുണ്ട്. ചാള്‍സ് ഈനാശു ഡൊമനിക് ആണ് ചിത്രത്തില്‍ മമ്മൂട്ടി. പഴയ പൊലീസ് ഓഫീസറാണ് ഡൊമിനിക്. കൊച്ചിയില്‍ സ്വകാര്യ ഡിറ്റക്റ്റ് ഏജൻസിയുള്ള കഥാപാത്രവുമാണ് ഡൊമനിക്.
മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെയാണ് ചിത്രം നിർമ്മിച്ചിരിക്കുന്നത്. ദുൽഖർ സൽമാന്റെ ഉടമസ്ഥതയിലുള്ള വേഫേറർ ഫിലിംസാണ് ചിത്രം കേരളത്തിൽ വിതരണം ചെയ്യുന്നത്. ഡോക്ടർ സൂരജ് രാജനും ഡോക്ടർ നീരജ് രാജനും രചന നിർവഹിച്ചിരിക്കുന്ന ചിത്രത്തിന്റെ ഛായാഗ്രഹണം വിഷ്‌ണു ആർ ദേവ് ആണ് ചെയ്തിരിക്കുന്നത്.
മമ്മൂട്ടിക്കൊപ്പം ഗോകുൽ സുരേഷ് ,സുഷ്മിത ഭട്ട്, വിജി വെങ്കിടേഷ്, വിനീത്, വിജയ് ബാബു തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. സൂപ്പർഹിറ്റ് തമിഴ് സംവിധായകൻ ഗൗതം വാസുദേവ് മേനോൻ ആദ്യമായി മലയാള സിനിമയിലെത്തുന്ന ചിത്രം കൂടിയാണ് ‘ഡൊമിനിക് ആൻഡ് ദ ലേഡീസ് പേഴ്സ്’.
