ബഹിരാകാശത്തേയ്ക്കുള്ള ഇന്ത്യൻ സ്വപ്നത്തിന് ഇനി ദൂരം അൽപ്പം കുറവാണ്. ഇന്ത്യൻ ബഹിരാകാശ സഞ്ചാരി ശുഭാൻഷു ശുക്ല ഉൾപ്പെട്ട ആക്സിയം 4 ദൗത്യം ഇന്ത്യൻ സമയം നാളെ വൈകിട്ട് അഞ്ചരയ്ക്കാണ് നാസയുടെ കെന്നഡി സ്‌പേസ് സെൻററിൽ നിന്ന് വിക്ഷേപിക്കുക. 1984 -ൽ രാകേഷ് ശർമയ്ക്ക് ശേഷം ബഹിരാകാശത്തേയ്ക്ക് പറക്കുന്ന ഇന്ത്യാക്കാരനാണ് ശുഭാൻശു ശുക്ല.
നാലു പതിറ്റാണ്ടുകൾക്ക് ശേഷം ബഹിരാകാശത്ത് എത്തുന്ന രണ്ടാമത്തെ ഇന്ത്യക്കാരാനാകാൻ ഒരുങ്ങുകയാണ് ഇന്ത്യൻ വ്യോമസേനയിലെ ഗ്രൂപ്പ് ക്യാപ്റ്റനും ഉത്തർപ്രദേശിലെ ലഖ്നൗ സ്വദേശിയുമായ ശുഭാംശു ശുക്ല. ആക്സിയം സ്‌പേസ്, നാസ, ഐ എസ് ആർ ഒ എന്നിവയുടെ സംയുക്ത ദൗത്യമാണിത്. പതിനാല് ദിവസം ശുഭാംശു ശുക്ല ബഹിരാകാശ നിലയത്തിലുണ്ടാകും. ഇന്ത്യയുടെ ഗഗൻയാൻ, ഭാരതീയ അന്തരീക്ഷ സ്റ്റേഷൻ ദൗത്യങ്ങളിൽ വൈദഗ്ധ്യം നേടാനുള്ള അവസരമായാണ് ISRO ശുഭാംശുവിന്റെ യാത്രയെ കാണുന്നത്. 31 രാജ്യങ്ങളിൽ നിന്നായി 60 ശാസ്ത്ര പരീക്ഷണങ്ങൾ ആക്സിയം 4 ദൗത്യത്തിൻറെ ഭാഗമാണ്.
ഗഗൻയാൻ ദൗത്യത്തിനുളള പരിശീലനം പൂർത്തിയാക്കാൻ അമേരിക്കയുമായി ധാരണയിൽ എത്തിയ പ്രകാരമാണ് ഈ ദൗത്യം. ഗഗൻയാൻ യാത്രികരിൽ നാലു പേരിൽ ഒരാളാണ് ശുഭാംശു.
ഇന്ത്യൻ വ്യോമസേന ഗ്രൂപ്പ് ക്യാപ്റ്റനായ ശുഭാംശുവിനെ 2019ൽ ആണ് ISRO ബഹിരാകാശ യാത്ര പരിശീലനത്തിനായി തിരഞ്ഞെടുത്തത്. ഫെറ്റർ പൈലറ്റായി 2006ൽ ആണ് ശുഭാംശു ഇന്ത്യൻ വ്യോമസേനയിൽ ചേർന്നത് മിഗ് , സുഖോയി , ഡോണിയർ , തുടങ്ങിയ വിമാനങ്ങൾ പറത്തുന്നതിൽ വിദഗ്ധൻ. 715 കോടി രൂപയാണ് ശുഭാംശുവിന്റെ യാത്രയ്ക്കായി ഇന്ത്യ ചിലവിടുന്നത് .
